वीरगंज | आज विश्वभर विभिन्न कार्यक्रमहरूको आयोजना गर्दै विश्व रेडियो दिवस मनाइँदैछ। संयुक्त राष्ट्रसंघीय शैक्षिक, वैज्ञानिक र सांस्कृतिक संगठन (युनेस्को) को आह्वानमा यो दिवस मनाइँदैछ, जसमा जलवायु परिवर्तनका कारण उत्पन्न समस्या र अनुकूलनबारे सचेतना फैलाउने रेडियो कार्यक्रम प्रसारण गरिने छ।

सन् २०११ मा युनेस्काका सदस्य राष्ट्रहरूले फेब्रुअरी १३ लाई अन्तर्राष्ट्रिय रेडियो दिवसको रूपमा मनाउने प्रस्ताव गरेका थिए। त्यसपछि २०१२ मा राष्ट्रसंघीय महासभाले यसलाई अनुमोदन गरेपछि यो दिवस मनाउन सुरु भएको हो।

रेडियो लोकतान्त्रिक बहसका लागि शक्तिशाली माध्यम मानिन्छ। यसले समाजका विविध पक्षलाई प्रतिनिधित्व गर्दै, आवाजविहीनको आवाज उठाउन महत्त्वपूर्ण भूमिका निभाउँछ। रेडियो विशेष गरी ग्रामीण क्षेत्रका सर्वसाधारणका लागि सूचना, मनोरञ्जन र शिक्षा उपलब्ध गराउने सशक्त माध्यम हो। विपत्तिका बेलामा, रेडियोले संकटको समयमा जानकारी र सहायता प्रदान गरी सामाजिक परिवर्तमा योगदान पुर्याएको छ।

रेडियोले समाजमा एकता कायम राख्न, संवादको क्षेत्रमा सकारात्मक दृष्टिकोण ल्याउन र सबै वर्गका मानिसहरूको आवाजलाई सार्वभौमिक बनाउँछ। यसको भूमिका अनमोल र महत्वपूर्ण छ, जसले आज पनि विश्वभरका मानिसहरूको जीवनमा गहिरो प्रभाव पार्दै आएको छ।