काठमाडौं | आज दिउँसो नेपाल विद्युत प्राधिकरणले विद्युतका लाइन भूमिगत गर्नका लागि होरीजोन्टल ड्रिलिङ गर्ने क्रममा काठमाडौंको बबरमहलस्थित खानेपानी थोक वितरण प्रणालीको पाइप फुट्दा क्षेत्र जलमग्न भएको छ।
घटनाको खबर पाएलगत्तै सम्बन्धित निकायका अधिकारीहरू घटनास्थलमा पुगेका छन्। खानेपानी मन्त्रालयका सचिव इ. प्रमिला देवी शाक्य, बज्राचार्य, काठमाडौं उपत्यका खानेपानी लिमिटेड (केयूकेएल) का सिइओ अशोक कुमार पौडेल, पिआइडीका प्रमुख टिकाबहादुर चौधरीसहितको टोली अहिले घटनास्थलमा रहेको छ।
घटनास्थलमा पुगेका एक अधिकारीका अनुसार, “पाइप फुटेर पानी बगिरहेको खबर पाउने बित्तिकै मैले काठमाडौ उपत्यका खानेपानी लिमिटेड, पिआइडी प्रमुखलाई पानी बन्द गर्न निर्देशन दिएको छु। हाल करिब ५० प्रतिशत पानी घटिसकेको छ।”
पाइप फुट्दा बबरमहल क्षेत्र जलमग्न भएपछि त्यहाँ रहेका विशेष अदालतसहितका सरकारी भवनहरू डुबानमा परेका छन्। साथै, सडकमा पानी जमेर सवारीसाधन आवतजावतमा समस्या भएको छ।
स्थिति नियन्त्रणमा लिन काठमाडौं उपत्यका खानेपानी लिमिटेडका प्रमुख कार्यकारी अधिकृतलाई भल्भ बन्द गर्न तथा वास(आउट) खोल्न निर्देशन दिइएको छ। हाल उक्त क्षेत्रमा खानेपानी आपूर्ति बन्द गरिएको छ।
यस घटनाले स्थानीय बासिन्दा र कार्यालयहरूलाई प्रभाव पारेको छ। सम्बन्धित निकायहरूले शीघ्र मर्मत कार्य गरी जनजीवन सुचारु गर्ने प्रतिबद्धता व्यक्त गरेका छन्।
