वीरगञ्ज । हिन्दु स्वयंसेवक सङ्घ नेपालले आयोजित स्वामी विवेकानन्द संस्कृति ज्ञान परीक्षा २०८१ सम्पन्न भएको छ ।
सोमबार वीरगञ्जको आदर्शनगरस्थित पुराना बसपार्कमा आयोजित परीक्षामा २२ सय भन्दा बढी विद्यार्थीको सहभागिता रहेको थियो ।
परीक्षामा वीरगञ्ज बीपीएस प्लस टु कलेजका सुमित प्रसाद कलवारले प्रथम स्थान प्राप्त गरे भने साउथ जोन स्कुलका विशाल यादवले दोस्रो र पिसजोन एकेडेमीकी प्रतीक्षा यादवले तेस्रो स्थान हासिल गरिन् ।
कार्यक्रम संयोजक जियालाल गुप्ताका अनुसार, विजेताहरूलाई नगद पुरस्कार र प्रमाण पत्रले सम्मानित गरिएको थियो । प्रथम भएका कलवारलाई लागि २२,५०० रुपैयाँ, दोस्रो भएका यादवलाई १६,५०० रुपैयाँ, र तेस्रो भएकी प्रतीक्षा यादवलाई १२,५०० रुपैयाँ नगदबाट पुरस्कृत गरिएको थियो ।
त्यसै गरी, परीक्षामा उत्कृष्ट प्रदर्शन गर्न नसकेका ५५ जनालाई सान्त्वना पुरस्कार स्वरूप १,१०० रुपैयाँ दिइएको थियो । सान्त्वना पुरस्कार प्राप्त गर्ने विद्यार्थीहरूमा बिपिएस प्लस २ का अनु साह, विशाल साह कलवार, सिताराम प्रसाद कुशवाहा, साउथ जोनका रुपेश कुमार कानु, प्रिन्स चौहान लगायतका विद्यार्थीहरू रहेका थिए ।
कार्यक्रममा विभिन्न विद्यालयका विद्यार्थीहरूले सांस्कृतिक नृत्य प्रस्तुत गरी कार्यक्रमलाई अझ रमाइलो र विशेष बनाएका थिए । सगरमाथा स्कुल, काव्य स्कुल, डेसीमल स्कुल, सुरजीदेवी मावि, नगवा मावि, माई स्थान मावि, तेजस एकेडेमी, र पिस जोन स्कुलका विद्यार्थीहरूले नृत्य प्रस्तुत गरेका थिए ।
स्वामी विवेकानन्द संस्कृति ज्ञान परीक्षा आयोजनाको मुख्य उद्देश्य विद्यार्थीहरूमा सनातन धर्म र संस्कृतिसँगै स्वामी विवेकानन्दका शिक्षाहरूको ज्ञान प्रवर्द्धन गर्नु थियो । कार्यक्रमले विद्यार्थीहरूलाई आफ्नो सांस्कृतिक पहिचान र धार्मिक मूल्यहरूमा गहिरो विश्वास बनाउन मद्दत पुर्याएको कार्यक्रम संयोजक जियालाल गुप्ताले बताए । त्यस्तै परीक्षाले विद्यार्थीहरूको समाज र संस्कृतिसँगको साक्षात्कार बढाउनुका साथै उनीहरूलाई भविष्यमा सामाजिक नेतृत्वका लागि तयार समेत गरेको उनले विश्वास व्यक्त गरे ।
कार्यक्रमले विद्यार्थीहरूलाई केवल प्रतिस्पर्धा गर्न मात्र नभएर सांस्कृतिक र सामाजिक दृष्टिकोणबाट पनि समृद्ध बनाउनको लागि ठूलो अवसर प्रदान गरेको हिन्दु स्वयंसेवक सङ्घ पर्साका जिल्ला सङ्घचालक माधव राजपालले बताए ।
कार्यक्रमको अध्यक्षता हिन्दु स्वयंसेवक सङ्घ पर्साका जिल्ला सङ्घचालक माधव राजपालले गरेका थिए भने प्रमुख अतिथिको रूपमा नेपाल प्रहरीका पूर्व एआइजी विजयलाल कायस्थ उपस्थित थिए ।
कार्यक्रममा नेपाल भारत सहयोग मञ्चका राष्ट्रिय अध्यक्ष अशोक वैध, माई स्थान विद्यापीठ स्कुलका प्रधानाध्यापक मुनिलाल कर्ण, र डेसीमल कलेजका निर्देशक सन्नी दुबेको उपस्थिति पनि रहेको थियो ।
