वीरगञ्ज । काठमाडौँको गौशालामा एक युवकमाथि कुटपिट गरी लुटपाट भएको छ । लुटपाट गरेको आरोपमा प्रहरीले चार जनालाई पक्राउ गरेको छ ।

पक्राउ पर्नेहरूमा पर्साको वीरगञ्ज महानगरपालिका–३२ घर भएका १८ वर्षीय परबेश अन्सारी, सोही ठाउँका १८ वर्षीय नजमुदिन अन्सारी, गोरखा नगरपालिका–१३ का १८ वर्षीय जनेद हुसेन र चितवनको पिप्ले घर भएकी १९ वर्षीया रश्मी क्षेत्री छन् ।

उनीहरूलाई काठमाडौं उपत्यका अपराध अनुसन्धान कार्यालयको टोलीले पक्राउ गरेको हो ।

उनीहरुले २४ माघको राति साढे १० बजेतिर इटहरी घर भएका एक युवकलाई युवतीको प्रयोग गरी गेस्टहाउस जाने हो भन्दै एकान्त स्थानमा लगेर केटाहरु बोलाई युवकलाई लुटपाट गरेको प्रहरीले जनाएको छ । उनीहरुले ती युवकको मोबाइल, पर्स, घडी लुटेर लगेको प्रहरीको भनाइ छ।

पक्राउ परेकाहरलाई कारबाहीका लागि प्रहरी वृत्त गौशाला पठाइएको छ ।