वीरगञ्ज । राष्ट्रिय मुक्ति पार्टी नेपालले पोखरिया नगरपालिकामा उठाइएका मागहरूको सुनुवाइ नभएको भन्दै फागुन १ गते विरोध कार्यक्रम गर्ने निर्णय गरेको छ । पार्टी संयोजक राजेश साहको अध्यक्षतामा बसेको बैठकले विरोध कार्यक्रमसहित जिल्ला कार्यसमितिको विस्तार गर्ने निर्णय गरेको हो ।

बैठकमा पार्टीका केन्द्रीय सदस्यहरू नेजामुद्दीन शमानी, अनिरुद्ध प्र. कलवार, रेखा घिमिरे लगायतका नेताहरूको उपस्थिति रहेको थियो । बैठकमा नेता नेजामुद्दीन शमानीले हाल बढाइएको सम्पत्ति कर फिर्ता गर्नुपर्ने, कर्मचारीहरूलाई समयमा तलब उपलब्ध गराउनुपर्ने, नगरपालिकाभित्र भइरहेको ठगी धन्दा बन्द गर्नुपर्ने, निर्माण कार्य सम्पन्न गरेका व्यक्तिलाई भुक्तानी दिनुपर्ने, नगर विस्तारमा जग्गा धनी तथा खरिदकर्ताहरूलाई जग्गा दिनुपर्ने, स्वास्थ्य बीमा गराएकाहरूलाई औषधि उपलब्ध गराउनुपर्ने तथा मधेश आन्दोलनका शहीद बिरबल मुखिया बिन र चंदन पटेलको नाममा शहीद पार्क निर्माण गर्नुपर्ने माग राखिएको बताए ।

त्यसैगरी, पार्टीले फागुन ७ गते आफ्नो कार्यालयको उद्घाटन गर्दै जिल्ला कार्यसमितिको विस्तार गर्ने निर्णय समेत गरेको छ । पार्टीका नेताहरूले पोखरिया नगरपालिकाले आफ्नो मागहरू पूरा नगरे थप कडा आन्दोलन गर्ने चेतावनी दिएका छन् ।