बारा । सिम्रनगढ नगरपालिकाको आयोजनामा सिम्रनगढ नगरपालिकाको मिटिङ हलमा महिला हरूमा हुने क्यान्सर सम्बन्धी अभिमुखीकरण कार्यक्रम सम्पन्न गरिएको छ।
उक्त कार्यक्रममा नारायणी अस्पतालका जनरल तथा ल्याप्रोस्कोपिक सर्जन, सर्जरी विभागका उपप्राध्यापक डा. सुनिलप्रसाद जयसवाल तथा नारायणी सेन्ट्रल अस्पतालकी वरिष्ठ स्त्री तथा प्रस्तुति रोग विशेषज्ञ डा. प्रियंका चौधरी द्वारा स्तन क्यान्सर तथा पाठेघरको मुखको क्यान्सर का बारेमा सिम्रनगढका ग्रामीण भेगमा कार्यरत ५० जना स्वास्थ्यकर्मीहरूलाई जनचेतनामूलक कार्यक्रम सम्पन्न गरिएको छ।
जनवरी महिना विश्व पाठेघरको मुखको क्यान्सर सम्बन्धी जनचेतना महिना भएकाले नेपाल सरकारले पनि यही माघ २३ गतेदेखि पाठेघरको मुखको क्यान्सर हुनबाट बचाउने HPV लगाउने कार्यक्रम रहेको जानकारी डाक्टर प्रियंका चौधरीले दिनुभयो । “समयमै भ्याक्सिन लगाए र नियमित चेकजाँच गराए पाठेघरको क्यान्सर जस्तो डरलाग्दो रोग बाट पनि मुक्त हुन सकिने डाक्टर प्रियंकाले बताउनु भयो।
नेपालमा एक वर्षमा करिब २००० महिला स्तन क्यान्सरले पीडित हुने जसमध्ये करिब ९०० जनाको मृत्यु भएको डाक्टर सुनिल जयसवालले बताउनुभयो। छाती अथवा स्तनमा भएको कुनै किसिमको गाठो गिल्ठीको समयमै चेकजाँच गरी उपचार गराए स्तन क्यान्सर पनि निको हुन सकिने डाक्टर जयसवाल ले बताउनुभयो।
आगामी दिनहरूमा पनि यस्ता कार्यक्रमहरु आयोजना गरी सिम्रनगढका जनतालाई क्यान्सरका लक्षणहरू का बारेमा जानकारी दिँदै उपचारका लागि प्रेरित गर्ने सिम्रनगढ नगरपालिकाका स्वास्थ्य शाखा प्रमुख विजय शंकर ठाकुर तथा अहेब पप्पु यादवले बताउनुभयो।
