वीरगंज | वीरगञ्जका दुई युवा सुमित श्रीवास्तव र सिद्धान्त सहनी गायन रियालिटी शोमा उत्कृष्ट प्रदर्शन गर्दै अर्को चरणमा छनौट भएका छन्। सुमित श्रीवास्तव ‘सिङ्गिङ स्टार नेपाल’ सिजन २ मा र सिद्धान्त सहनी ‘द भ्वाइस अफ नेपाल’ सिजन ६ मा छानिएका हुन्।
सुमित श्रीवास्तवले ‘सिङ्गिङ स्टार नेपाल’ सिजन २ को दोस्रो चरणमा स्थान पाएका छन्। उनले उदित नारायण झा र दीप नारायण झाको ‘ए मेरो हजुर’ गीत गाएर निर्णायकहरूलाई प्रभावित गरेका थिए। उनका प्रस्तुति पछि तीनै निर्णायक अर्जुन पोखरेल, डा. तृषला गुरुङ र सनुप पौडेलले उनलाई अर्को चरणमा छनौट गरेका थिए। सुमितको गायन यात्रा बाल्यकालदेखि नै शुरू भएको हो र उनले वीरगञ्जका विभिन्न सांगीतिक प्रतियोगितामा भाग लिँदै आफ्नो पहिचान बनाएका थिए। रियालिटी शोमा छनौट भएपछि उनले दर्शकको माया र साथले आफूलाई थप हौसला मिल्ने प्रतिक्रिया दिएका छन्।
सिद्धान्त सहनीले ‘द भ्वाइस अफ नेपाल’ सिजन ६ को ब्लाइन्ड अडिसनमा धमाकेदार प्रस्तुति दिएका थिए। उनले पुष्पन प्रधानको ‘बाबुको जुँगो बन्धकी राखेर’ गीत गाएर निर्णायकहरूलाई चकित पारे। कोच मेलिना राई सबैभन्दा पहिले प्रभावित भइन् र आफ्नो कुर्सी घुमाइन्, पछि उदय सोताङ र खेम सेञ्चुरीले पनि उनलाई टिममा समावेश गर्न इच्छुक देखाए। अन्ततः उनले उदय सोताङको टिम रोजे।
वीरगञ्जका यी दुई युवाका सफलता देखेर स्थानियवासी उत्साहित छन्। भोजपुरी समाज नेपालका अध्यक्ष ध्रुवसिंह ठकुरीका अनुसार, यसले वीरगञ्जको सांगीतिक पहिचानलाई अझ बलियो बनाएको छ।
सिद्धान्त र सुमितका सफलताले वीरगञ्जका अन्य युवा संगीतप्रेमीहरूलाई पनि प्रेरणा दिएको छ। विशेषगरी, वीरगञ्जबाट संगीत रियालिटी शोमा सहभागिता जनाउने यो पहिलो पटक भने होइन। यसअघि, नेपाल आईडल र द भ्वाइस अफ नेपालमा वीरगञ्जका झुमक ब्याण्डका विवेक परियारले समेत उत्कृष्ट प्रदर्शन गरेका थिए। उनले उपाधि जित्न नसकेपनि निर्णायक र दर्शकहरूको मन जित्न सफल भएका थिए।
सिद्धान्त र सुमितको सफलता मात्र वीरगञ्जको पहिचानलाई थप उचाइमा पुर्याएको छैन, बरु यसले अन्य युवाहरूलाई पनि आफ्नो कला र प्रतिभा प्रकट गर्न प्रोत्साहित गरेको छ। आगामी चरणमा यी दुईको प्रदर्शन कस्तो हुने हो भन्ने कुरा दर्शकहरूमा निकै उत्सुकता र चासोको विषय बनेको छ।
वीरगञ्जका यी दुई युवा गायकहरूको यात्रा अगाडि बढ्दै जाँदा यस क्षेत्रका संगीतप्रेमीहरूको समर्थन र माया उनीहरूको सफलता पथमा महत्त्वपूर्ण भूमिका खेल्ने छ।
