वीरगंज | नेपाल कम्युनिष्ट पार्टी (एकीकृत समाजवादी) का अध्यक्ष तथा पूर्वप्रधानमन्त्री माधवकुमार नेपालले बाराको निजगढमा अन्तर्राष्ट्रिय विमानस्थलको निर्माण तत्काल गर्नुपर्ने आवश्यकता औंल्याएका छन्। रौतहटको गौरमा आयोजित ‘नेपाल–भारत मैत्री संवाद’ कार्यक्रममा बोल्दै अध्यक्ष नेपालले निजगढ विमानस्थलको निर्माणलाई व्यावसायिक र पर्यटकीय दृष्टिकोणबाट अनिवार्य भएको बताए।
उनले निजगढ–काठमाडौँ ‘फास्ट ट्र्याक’ को निर्माणसँगै विमानस्थल निर्माणलाई तीव्रता दिनुपर्नेमा जोड दिएका छन्। अध्यक्ष नेपालका अनुसार, नेपाल र भारतको सीमा समस्या समाधानका लागि केन्द्रीय सरकारको नीति निर्माण आवश्यक रहेको छ र यसमा स्थानीय जनप्रतिनिधिहरूको पहल पनि महत्वपूर्ण हुने बताएका छन्। “सीमा समस्या समाधानका लागि जुनसुकै बेला सहयोग गर्न तत्पर छु,” उनले भने।
कार्यक्रममा मधेस प्रदेशसभा सदस्य नागेन्द्र साह, भारतका रिगा विधानसभा क्षेत्रका विधायक मोतिलाल साह, गौर नगरपालिकाका प्रमुख शम्भु साह, बौधीमाई नगरपालिकाका प्रमुख प्रदीपकुमार यादव लगायतका प्रमुख व्यक्तिहरूले पनि आफ्नो धारणा राखेका थिए।
कार्यक्रमको अध्यक्षता मिडिया फर बोर्डर हार्मोनी रौतहटका अध्यक्ष किशोरीराय यादवले गरेका थिए। हार्मोनी भारतका अध्यक्ष अमरेन्द्र तिवारीले सीमा क्षेत्रमा बस्ने नेपाल–भारतका नागरिकहरूले भोगिरहेका समस्याहरूको समाधानका लागि १७ बुँदे साझा माग प्रस्तुत गरे।
कार्यक्रममा नेपाल र भारतका सञ्चारकर्मी, राजनीतिक दलका नेता, कार्यकर्ता र स्थानीय नागरिकहरूको उल्लेख्य उपस्थिति थियो।
