बारा । सिकिन्द्र साह । बारा जिल्लाको आदर्शकोतवाल गाउँपालिका वडा नम्बर ८, बोहा जमुनिया नजिकैको सार्वजनिक जमिन लिजमा लिएर उमाकान्त यादवले गौल भेडा उत्पादन गर्दै लाखौंको आम्दानी गरेका छन्। उनले पोखरा, नारायणगढ, काठमाडौंजस्ता ठूला सहरमा गौल भेडा बिक्री गर्दै उदाहरणीय सफलता हासिल गरेका हुन्।

यादवका अनुसार नेपालमै आधुनिक र वैज्ञानिक पद्धतिबाट कृषि तथा पशुपालन व्यवसाय गरी राम्रो आम्दानी गर्न सकिन्छ। “देशमै काम गरेर लाखौं कमाउन सकिन्छ। मानसिकता परिवर्तन गर्नु अहिलेको आवश्यकता हो। विदेशी भूमिमा गुलामी गर्नु भन्दा आफ्नै देशमा केही गर्नुपर्छ,” यादव भन्छन्।
उनले स्थानीय समुदायसँग सहकार्य गर्दै करिब २५ लाख मूल्यका गौल भेडा बिक्री गरिसकेका छन्। “आफ्नो कमाइ समाजलाई देखाउनु गुनाह होइन।

युवाले नेताको पछि लागेर समय खेर फाल्नु वा विदेश गएर न्यून तलबमा काम गर्नु भन्दा आफ्नै देशमा उद्यमशील बन्नु आवश्यक छ,” उनले भने।
गौल भेडा उत्पादनका कारण स्थानीयले रोजगारी पाएका छन् भने यहाँका किसानले पनि नयाँ प्रविधि सिकेर खेती गर्ने अवसर पाएका छन्। विदेश जाने लहर बढ्दै गएको बेला युवाले स्वदेशमै केही नयाँ गर्ने सोच राख्न आवश्यक रहेको यादवको भनाइ छ।