वीरगंज | पूर्वपश्चिम राजमार्गअन्तर्गत रौतहट र सर्लाही जिल्लाको सिमानामा पर्ने बागमती पुलको एउटा स्पर भाँसिएपछि दुर्घटनाको जोखिम बढेको छ। दैनिक हजारौं सवारीसाधन गुड्ने यस पुलको पुरानो स्पर भाँसिएपछि स्थानीयहरूले तुरुन्त मर्मत गर्न आग्रह गरेका छन्।
सर्लाहीबाट आउँदा पाँच नम्बर र रौतहटतर्फ जाँदा सात नम्बरको स्पर करिब ८ सेन्टिमिटर भाँसिएको छ। सडक डिभिजन कार्यालय चन्द्रनिगाहपुरका अनुसार पुलको बेरिङ फुटेकाले जोडिएका दुई स्परहरू बीचको अन्तर बढेको छ, जसका कारण सवारी साधनका चालकहरूले उच्च सावधानी अपनाउनु पर्ने अवस्था आएको छ।
पचास वर्षअघि तत्कालीन सोभियत संघ सरकारको आर्थिक सहयोगमा निर्माण गरिएको यो पुल समयसँगै जीर्ण बन्दै गएको छ। सडक विभागले समय-समयमा मर्मत गरे पनि अहिलेको अवस्था गम्भीर रहेको जनाइएको छ।
सडक डिभिजन कार्यालय चन्द्रनिगाहपुरका प्रमुख अरुण कुमारलाल कर्णले पुलको स्पर भाँसिएकोले सवारी साधन सञ्चालनमा सतर्कता अपनाउनुपर्ने र भारी सवारी एक पटकमा मात्र सञ्चालन गर्न ट्राफिक कार्यालयलाई निर्देशन दिएको जानकारी गराएका छन्।
स्थानीय बासिन्दा गोपाल घिमिरेले पुलको भाँसिएको स्परको विषयमा सम्बन्धित निकायले तुरुन्त ध्यान दिनुपर्ने र समयमा मर्मत नगरे दुर्घटनाको जोखिम बढ्ने चेतावनी दिएका छन्।
सडक डिभिजन कार्यालयले पुलको जोखिमबारे पुल महाशाखा काठमाडौंलाई जानकारी गराइसकेको छ। साथै, रौतहट र सर्लाहीका ट्राफिक प्रहरी कार्यालयलाई सवारी साधनको सञ्चालनमा विशेष सावधानी अपनाउन आग्रह गरिएको छ।
यस पुलको समस्या समाधान गर्न समयमै मर्मतसम्भार नगरे दुर्घटनाले मानवीय र आर्थिक क्षति निम्त्याउन सक्ने भन्दै स्थानीयहरूले तुरुन्त पहल गर्न आग्रह गरेका छन्।
