वीरगञ्ज । तराई मधेशका विभिन्न जिल्लामा हुस्सु र शीतलहरले चिसो बढेपछि जनजीवन प्रभावित भएको छ ।
जल तथा मौसम विज्ञान विभागको मौसम पूर्वानुमान महाशाखाले तापक्रम घट्दै गएकाले चिसो थप बढ्ने जनाएको छ ।
महाशाखाका अनुसार देशको विभिन्न भूभागमा साथै तराई र मधेसका जिल्लामा हुस्सु लागेर चिसो बढेको छ । तराईका विभिन्न जिल्लामा बाक्लो हुस्सु लाग्ने, मौसम धुम्मिने, बिहानदेखि लगभग बेलुकासम्मै शीतलहर परेर चिसो बढ्न थालेको छ ।
चिसोले बिहान आवतजावत गर्ने विद्यार्थी, मजदुर, बालबालिका, गरिब, असहाय, ज्येष्ठ नागरिक बढी प्रभावित भएको वीरगञ्ज युवा समाजका संस्थापक अध्यक्ष कमल चौगाईले बताए । चिसोबाट बालबालिका बढी प्रभावित भएका छन् ।
चिसोका कारण बजारमा पनि चहलपहल घटेको वीरगञ्ज उद्योग वाणिज्य संघका अध्यक्ष अनिल कुमार अग्रवालले बताए । उनकाअनुसार न्यानो कपडाका पसलमा भने ग्राहकको भीड बढेको छ ।
कठ्याङ्ग्रिँदो चिसोसँगै केही नदेखिने गरी हुस्सु लाग्दा सवारी साधन चलाउन पनि समस्या भएको सीमाराका सवारीचालक प्रदीप श्रेष्ठले बताए ।
जिल्ला अस्पतालमा बालबालिका, वृद्धवृद्धा साथै मुटु, दम, फोक्सो, मधुमेह तथा अन्य दीर्घरोगी चिसोले गर्दा बढेका स्वास्थ्यकर्मीको भनाइ छ । नारायणी अस्पतालका फिजिसियन डा. उदयनारायण सिंहले चिसोले दम, निमोनिया, रुघाखोकी, ज्वरोलगायत रोगका बिरामी बढेको हुँदा स्वास्थ्य सर्तकता अपनाउन सुझाव दिएका छन् ।
हुस्सुका कारण सिमरा विमानस्थलको उडान समेत प्रभावित भएको छ ।
