वीरगञ्ज । आम जनता पार्टीका नेताहरुले वीरगञ्जको घण्टाघरमा पत्रकार सम्मेलन गरेका छन् । पत्रकार सम्मेलन गर्दै आजपाका नेताहरुले वीरगञ्जलाई आर्थिक राजधानी बनाउनुपर्नेमा जोड दिएका छन् । पत्रकार सम्मेलनमा पर्सा क्षेत्र नम्बर १ बाट निर्वाचित मन्त्री यादवमाथि आक्रोश पोखेका छन् ।
आम जनता पार्टी पर्सा जिल्ला उपाध्यक्ष सन्ध्या पासवानले मन्त्री यादवले वीरगञ्जको विकासका लागि केही गर्न नसकेको टिप्पणी गरिन् । यहाँका युवा र जनता जागिसकेको बताउँदै उनले खबरदारी गर्नुपर्नेमा जोड दिइन् ।
आजपा पर्साका अध्यक्ष विश्वराज पटेलले पनि मन्त्री यादवप्रति आक्रोश पोखे । उनले भने, ‘वीरगञ्जबासीले विकासको नाममा केही पाएका छैनन् । यहाँका नेताहरुले वीरगञ्जको विकास भन्दा पनि आफ्नो विकासमा केन्द्रित भए । यहाँका नेताहरु असक्षम र असफल भएका छन् ।’ मधेश आन्दोलनमा जनतालाई दिइएका आशाहरु कता गए भन्दै उनले प्रश्न गरे । वीरगञ्जलाई आर्थिक राजधानी बनाउनका लागि दबाब दिने अभिप्रायले आम जनता पार्टीले अभियान थालेको पनि उनले स्पष्ट पारे ।
प्रदीप यादवले स्वास्थ्य मन्त्री हुँदा नारायणी अस्पताललाई मेडिकल कलेज किन बनाउन सक्नुभएन ? भन्दै आजपा मधेश प्रदेशका अध्यक्ष उमेश कुशवाहले प्रश्न गरे । प्रदेश अध्यक्ष कुशवाहकाअनुसार मन्त्री यादव पटकपटक मन्त्री बन्दा पनि पर्साबासीले केही पाउन नसक्नु दुखद हो ।
पत्रकार सम्मेलनमा उनले भने, ‘वन मन्त्री हुँदा चिडिया खाना शिलान्यास गरेर छोडियो, कहिले सञ्चालन हुन्छ ? पटकपटक मन्त्री भएर पनि केही गर्न सक्नुभएन । ठाकुरराम बहुमुखी क्याम्पस पनि जिर्ण छ, चिनी मिल सञ्चालन हुन सक्दैन । वीरगञ्ज आर्थिक राजधानी बन्न सकेन ।’ अब जनतालाई झुक्याउने कार्य छोड्न आग्रह गर्दै उनले वीरगञ्जको विकासका लागि काम गर्नु अनुरोध गरे ।
आम जनता पार्टीले वीरगञ्जलाई आर्थिक राजधानी बनाउने र वीरगञ्जको विकास गर्ने एजेण्डाको साथमा थालेको आन्दोलनलाई साथ अध्यक्ष कुशवाहले अनुरोध गरेका छन् । वीरगञ्जलाई आर्थिक राजधानी घोषणा नगरेसम्म विभिन्न माध्यमबाट दबाब सृजना गरीरहने पनि उनले बताए ।
यता मन्त्री यादवले भने बाटोमा ४/५ जनालाई जम्मा गरेर आफुले गरेको कामको बारेमा थाहा नहुने प्रतिक्रिया दिएका छन् । उनले आफुले गरेका कामको बारेमा खोजी गर्न र वीरगञ्जका जनतासँग सोध्न पनि अनुरोध गरे । पछिल्लो समय प्रभु साह नेतृत्वको आम जनता पार्टी अराजक बन्दै गएको बताउँदै उनले अरुको क्षेत्रको चिन्ता भन्दा पनि आफ्नो क्षेत्रमा विकास निर्माणमा केन्द्रित हुन पनि सुझाव दिए ।
