वीरगञ्ज । पर्सा जिल्लाको धोबिनी गाउँपालिका–१ निवासी विजय शाह रौनियारले १९ वर्षकै उमेरमा नायब सुब्बा पदमा नियुक्ति पाउने अद्वितीय सफलता हासिल गरेका छन् ।
मधेस प्रदेशको प्रतिनिधित्व गर्दै रौनियारले लोकसेवा आयोगद्वारा आयोजित प्रतिस्पर्धात्मक परीक्षामा पहिलो प्रयासमै नाम निकाल्दै जिल्ला समन्वय समिति कार्यालय सिन्धुपाल्चोकमा सिफारिस हुन सफल भएका हुन् ।
रौनियारको उपलब्धि मधेसका लागि मात्र नभई सम्पूर्ण देशका युवाहरूका लागि प्रेरणाको स्रोत बनेको छ । सरकारी सेवामा सफलतापूर्वक प्रवेश गर्दै उनले प्रतिस्पर्धात्मक परीक्षाहरूमा निरन्तर मेहनत र दृढ इच्छाशक्ति भए कुनै पनि लक्ष्य हासिल गर्न सकिन्छ भन्ने उदाहरण प्रस्तुत गरेका छन् ।
उनी वीरगञ्जस्थित ब्राइट पब्लिक स्कुलका विद्यार्थी हुन् । अध्ययनका दौरान नै उनी मेहनती, अनुशासित र लक्ष्यप्रति समर्पित थिए । ब्राइट पब्लिक स्कुलका निर्देशक मुकेश गुप्ताले विजयको सफलतालाई विद्यालयकै गर्वको विषय ठानेका छन् ।
यात्रा डेलीसँगको संवादमा उनले भने, “विजयले देखाएको अनुशासन, मेहनत र आत्मविश्वास प्रेरणादायी छ । हामीले सधैँ विद्यार्थीहरूलाई जीवनका हरेक क्षेत्रमा उत्कृष्टता हासिल गर्न प्रोत्साहन गर्दै आएका छौँ । विजयले विद्यालय, अभिभावक, र मधेस क्षेत्रको शान बढाएका छन् । उसको सफलताले अन्य विद्यार्थीहरूलाई पनि प्रेरणा मिल्ने छ ।”
रौनियारले आफ्नो सफलता परिवारको माया, गुरुहरूको निर्देशन र साथीहरूको सहयोगको कारण सम्भव भएको बताएका छन् । उनले भने, “मेहनत, धैर्य र निरन्तर अभ्यासले मात्र सफलता हात लाग्छ । म हरेक युवाहरूलाई कुनै पनि परिस्थिति आए पनि आफ्नो लक्ष्यप्रति दृढ रहन सल्लाह दिन चाहन्छु । असफलता आउँदा पनि हार मान्नु हुँदैन, किनभने त्यो नै सफलताका लागि सिँढी हो ।” उनले सही योजनासहितको तयारीले हरेक चुनौती सहजै पार गर्न सकिने बताए ।
रौनियारले मधेस क्षेत्रका युवाहरूलाई सरकारी सेवामा सक्रिय सहभागिता जनाउन आह्वान गरेका छन् । उनले भने, “हामी सबैसँग कुनै न कुनै प्रतिभा छ । त्यसलाई पहिचान गरी सही दिशामा लगानी गर्न सक्यौँ भने सफलता अवश्य प्राप्त हुन्छ । मधेस क्षेत्रबाट आएका प्रतिभाहरूले आफ्नो पहिचान देशभर फैलाउन सक्छन् ।”
नायब सुब्बाको जिम्मेवारी सम्हाल्न उत्साहित रौनियारले इमानदारी, पारदर्शिता र सेवा भावनाले काम गर्ने प्रतिबद्धता व्यक्त गरेका छन् । “यो त केवल मेरो यात्रा सुरु भएको हो । मेरो लक्ष्य समाजलाई सकारात्मक परिवर्तनतर्फ लैजानु हो। म यस जिम्मेवारीलाई सदैव सम्मानपूर्वक पूरा गर्नेछु,” उनले भने।
विजय शाह रौनियारको सफलता केवल व्यक्तिगत उपलब्धिमा मात्र सीमित छैन । यो एउटा सन्देश हो— यदि इच्छाशक्ति र परिश्रम छ भने कुनै पनि लक्ष्यलाई असम्भव मान्न आवश्यक छैन । उनलाई यस अद्वितीय सफलताका लागि हार्दिक बधाई तथा सफल कार्यकालका लागि शुभकामना !
