वीरगञ्ज । पर्साको बहुदरमाई नगरपालिकाका शिक्षकहरुले पर्साका प्रमुख जिल्ला अधिकारीलाई विद्यालयको साँचो हस्तान्तरण गरेका छन् । चालु आर्थिक वर्षको श्रावणदेखि हालसम्म पारिश्रमिक तथा सेवा सुविधा नपाएको भन्दै बहुदरमाई नगरपालिका मातहतका सबै सामुदायिक विद्यालयका शिक्षक कर्मचारीले प्रमुख जिल्ला अधिकारी गणेश अर्याललाई विद्यालयको साँचो हस्तान्तरण गरेका हुन् ।

शिक्षक महासंघ पर्साका अध्यक्ष तिर्थराज यादवको नेतृत्वमा विभिन्न नाराबाजी गर्दै बहुदरमाईका २० वटा सामुदायिक विद्यालयका प्रधानाध्यापक, शिक्षक, कर्मचारी लगायतले अर्याललाई साँचो हस्तान्तरण गरेका हुन् । ‘२०८१ श्रावणदेखिको हाम्रो तलब खोई ?, शिक्षक एकता जिन्दावाद, हाम्रो माग पूरा गर’ लगायतका नारा लेखिएको प्लेकार्ड सहभागी शिक्षकहरुले बोकेका थिए ।

सात महिनासम्मको तलब नपाएपछि र पटकपटक माग गर्दा पनि सुनुवाई नभएपछि बाध्य भएर साँचो बुझाउनु परेको शिक्षक महासंघ पर्साका अध्यक्ष तिर्थराज यादवले बताए । उनले भने, ‘हामी शिक्षकहरु बालबालिकाप्रति अत्यन्तै संवेदनशिल छौ, विद्यालयको पढाई लेखाई रोक्ने पक्षमा हामी कहिले हुँदैनौ । तर विगत ७ महिनादेखि अहिलेसम्म तलब नपाएपछि हामी बाध्य भएका छौँ ।’

विद्यालयमा पठनपाठनका लागि तलबका अलावा परीक्षा सञ्चालनदेखि अन्य कार्यका लागि आवश्यक पर्ने रकम पनि निकासा नभएको अध्यक्ष यादवको भनाई छ । यति मात्रै नभएर नेपाल सरकारले अनिवार्य गरेको दिवा खाजाबाट पनि बहुदरमाई नगरपालिकाका बालबालिका बञ्चित भएका छन् । दशै, तिहार, छठ, माघे संक्रान्ति लगायतका पर्वहरुमा पनि तलब नपाएपछि अहिले शिक्षक कर्मचारीहरु आर्थिक रुपमा कमजोर बनेर मनोबल पनि कमजोर बनेको अध्यक्ष यादवले बताए ।

नगरपालिकामा चलीरहेको जुँगाको लडाईमा शिक्षामाथि हस्तक्षेप गर्ने र पालिकामा राजनीतिकरण गरेर शैक्षिक मात्रै नभएर पालिकाका हरेक कामलाई प्रभावित गर्ने कार्य कुनै पनि हालतमा उपयुक्त नभएको सो अवसरमा सहभागी शिक्षकहरुले प्रतिक्रिया दिए ।

यसअघि पनि बुधवार, बिहिवार, शुक्रवार सम्म हाफ टाइमसम्म पढाएर सांकेतिक रुपमा विरोध गरिएको थियो । सात महिनासम्म पनि सेवा सुविधा र तलब नपाएपछि धैर्यताको बाँध फुटेपछि विद्यालयको साँचो बुझाउने अवस्थाको सृजना भएको श्री भंगी साह माद्यामिक विद्यालयका प्रधानाध्यापक मनोज उपाध्यायले बताए ।

विद्यालयका साँचो ग्रहण गर्दै प्रमुख जिल्ला अधिकारी गणेश अर्यालले यस्तो अवस्था आउनु अत्यन्तै दुखद पक्ष भएको बताए । बहुदरमाई नगरपालिकामा पटकपटक पहल गर्दा पनि नतिजा नआउँदा अहिलेको अवस्था सृजना भएको उनको भनाई छ । तत्कालै तलब निकासाका लागि लिखित रुपमा मौखिक रुपमा पनि पटकपटक प्रयास गर्दा सफल हुन नसकेको अर्यालले बताए । उनले अझै पनि आफ्नो तर्फबाट हरसम्भव प्रयास गरीरहेको जानकारी दिए ।