वीरगंज | वीरगञ्जमा शैक्षिक सहिद मुकुन्द प्रसाद खनालको १७ औं स्मृति दिवसको अवसरमा विशेष कार्यक्रम सम्पन्न भएको छ। शैक्षिक सहिद मुकुन्द प्रसाद खनाल स्मृति प्रतिष्ठान, पर्साको आयोजनामा शुक्रबार मानवसेवा आश्रमका ५० जना आमाबुवा र बालबालिकालाई बिहानको खाना सप्रेम खुवाइएको थियो।
कार्यक्रमको उद्घाटन प्रतिष्ठानका अध्यक्ष मुना खनालले स्वर्गीय मुकुन्द प्रसाद खनालको तस्वीरमा फूलमाला अर्पण र दीप प्रज्वलन गरी गर्नुभएको थियो। कार्यक्रममा खनालको शिक्षा र सामाजिक सेवामा पुर्याएको योगदानको सम्झना गर्दै उहाँले ठाकुरराम क्याम्पसमा गरेका कार्यको उच्च कदर गरिएको थियो।
समारोहमा प्रमुख अतिथि वरिष्ठ सल्लाहकार प्रकाश कुमार उपाध्यायले शैक्षिक सहिद मुकुन्द खनालको समाज सेवामा दिएको योगदानको प्रशंसा गर्नुभयो। अन्य विशिष्ट अतिथिहरूमा मानवसेवा आश्रमका प्रतिनिधि प्रकाश थारु र मुना मगर, ज्ञानदा एकेडेमिकाका प्रधानाध्यापक राजेन्द्र कोइराला, र प्रतिष्ठानका सचिव लाल बाबु सिंहलगायतका विशिष्ट व्यक्तित्वहरूको उपस्थिति थियो।
समारोहको विशेष क्षणमा नेपाल पत्रकार महासंघ पर्साका अध्यक्ष ओम प्रकाश खनाललाई दोसल्ला ओढाएर सम्मान गरियो। उक्त सम्मानले पत्रकारितामा उहाँको योगदानलाई उच्च सम्मान गरिएको आयोजकले जनाएको छ।
अध्यक्ष मुना खनालले मानवसेवा आश्रममा गरिएको सहयोगले आफूलाई प्रेरणा दिएको बताउँदै स्वर्गीय मुकुन्द खनालको सपना साकार पार्न थप सामाजिक कार्य गर्ने प्रतिबद्धता व्यक्त गर्नुभयो। उहाँले प्रतिष्ठानले शिक्षा र समाजसेवामा प्रभावकारी योगदान दिन निरन्तर क्रियाशील रहने विश्वास व्यक्त गर्नुभयो।
कार्यक्रमका क्रममा स्वागत मन्तव्य र सहजीकरण प्रतिष्ठानका सचिव लाल बाबु सिंहले गर्नुभएको थियो। सहभागी अतिथिहरूले समाजसेवाको क्षेत्रमा प्रतिष्ठानले पुर्याउँदै आएको योगदानको प्रशंसा गर्दै आगामी दिनमा पनि थप सक्रियता र योगदानको अपेक्षा गरेका थिए।
कार्यक्रम शैक्षिक सहिदको सम्झनामा समाजसेवा र सहकार्यको महत्वलाई उजागर गर्न केन्द्रित रहेको थियो। समारोहले समुदायलाई सामाजिक सेवामा संलग्न हुन प्रेरित गरेको आयोजकको विश्वास छ।
