वीरगञ्ज । २७औं भूकम्प सुरक्षा दिवसको अवसरमा वीरगञ्जमा ‘बलियो संरचना र सुदृढ पूर्वतयारी’ भन्ने नाराका साथ बुधबार अन्तर्संवाद कार्यक्रम सम्पन्न भएको छ। कार्यक्रममा विपद् व्यवस्थापन, संरचना सुदृढीकरण, र भूकम्प सुरक्षा सम्बन्धी विभिन्न विषयमा छलफल गरिएको थियो।

कार्यक्रमका प्रमुख अतिथि प्रमुख जिल्ला अधिकारी (प्रजिअ) गणेश अर्यालले विपद् आउनु अघि नै सावधानी अपनाउनुपर्नेमा जोड दिए। “विपद् बाजा बजाएर नआउने भएकाले सतर्कता नै जोखिम न्यूनीकरणको आधार हो,” उनले भने। प्रजिअ अर्यालले संरचना मापदण्ड पालना गर्दै भवन निर्माण गर्दा भौतिक क्षति न्यून हुने बताए। साथै, विपद् व्यवस्थापनमा स्थानीय तहहरू सक्रिय नदेखिएको र राहत वितरणमा भ्रष्टाचार हुने गरेको आरोप लगाए।

स्थानीय तहका प्रमुखहरूको धारणा
वीरगञ्ज महानगरपालिकाका नगरप्रमुख राजेशमान सिंहले यस्ता कार्यक्रमहरूमा प्रतिबद्धता जनाइए पनि कार्यान्वयनमा ध्यान नदिइने गुनासो गरे। “कार्यक्रम अवधिभर प्रतिबद्धता जनाउने तर पछि बिर्सने हाम्रो परम्परा रहेको छ,” उनले भने। सिंहले महानगरपालिकाले १० तलाभन्दा माथिका भवनहरू निर्माण गर्न अनुमति दिनसक्ने तर यसका लागि स्रोत र साधनको व्यवस्थापन आवश्यक रहेको बताए।

सखुवाप्रसौनी गाउँपालिकाका अध्यक्ष यशवन्त यादवले गाउँपालिकाको ६३ करोड रुपैयाँको बजेट विभिन्न विकास परियोजनामा खर्च गर्ने योजना रहेको बताए। चीसो मौसममा दाउरा वितरणमा वन नियमले समस्या उत्पन्न गरेको उल्लेख गर्दै उनले समयमै समाधानको आवश्यकता रहेको बताए।

विपद् व्यवस्थापनको आवश्यकतामा जोड
सशस्त्र प्रहरी १३ नं गणका प्रमुख राधेश्याम धितालले भूकम्प जुनसुकै बेला आउन सक्ने भएकाले सतर्कता आवश्यक रहेको बताए। उनले सुरक्षित घर निर्माण र विपद् व्यवस्थापनका उपायहरू अवलम्बन गर्न सबैलाई आग्रह गरे।

कार्यक्रममा पर्साका विभिन्न स्थानीय तहका प्रमुखहरू, प्रशासकीय अधिकृत, र सुरक्षा निकायका प्रतिनिधिहरूको उपस्थिति रहेको थियो। वीरगंज महानगरपालिकाका प्रमुख प्रशासकीय अधिकृत अरविन्दलाल कर्णले स्वागत मन्तव्य व्यक्त गरेका थिए भने सहायक प्रजिअ निशानराज गौतमले कार्यक्रमको सहजीकरण गरेका थिए।

कार्यक्रमले भूकम्प सुरक्षाका उपाय र संरचना सुदृढीकरणका लागि सबै तहमा समन्वय र सक्रियताको आवश्यकता रहेको निष्कर्ष निकाल्यो।