हेटौंडा । मकवानपुर उद्योग वाणिज्य संघको अध्यक्षमा प्रमोदसिंह रानाभाट विजयी भएका छन् ।

शनिबार नयाँ नेतृत्व चयनका लागि भएको निर्वाचनमा २०४६ मतदातामध्ये १८१६ जनाले मतदान गरेका थिए । कुल २८ पदमध्ये २१ पदमा ४२ जना उम्मेदवारबीच चुनावी प्रतिस्पर्धा भएको थियो । दुई सचिवसहित ७ जना निर्विरोध भएका थिए ।

रानाभाटले प्रतिद्वन्द्वी अनिल अग्रवाललाई २४९ मतान्तरले पराजित गरे । रानाभाटले एक हजार १४ मत पाउँदा अग्रवालले ७६५ म ल्याए । रानाभाट र अग्रवाल प्यानर बनाएर चुनावी प्रतिस्पर्धामा होमिएका थिए । पदाधिकारीमा रानाभाट प्यानलका धेरैले जित निकालेका छन् ।

अध्यक्षमा निर्वाचित रानाभाट अटो इन्जिनियरिङ, यातायात, र स्वास्थ्य क्षेत्रका व्यवसायी हुन । रानाभाटले आफ्नो तीन पुस्ताको व्यवसायिक परम्परालाई सफलतापूर्वक अघि बढाउँदै आएका हुन । मकवानपुर उद्योग वाणिज्य संघमा उनको संलग्नता २०६८ सालमा सदस्यका रूपमा भएको थियो । त्यसयता, उनले कोषाध्यक्ष, महासचिव, र उपाध्यक्ष पदमा रहेर संघमा काम गरे ।

यसैगरी, महासचिवमा प्रतिमा श्रेष्ठ एक हजार १२ मतसहित विजयी भइन् । उनले निकटतम प्रतिस्पर्धी बिकेशलाल श्रेष्ठलाई २९९ मतान्तरले पराजित गरिन् । कोषाध्यक्ष पदमा तेजराज अधिकारी ९१७ मतसहित विजयी भए भने उनका प्रतिस्पर्धी श्रीकृष्ण कर्माचार्यले ८०१ मत प्राप्त गरे । सह-कोषाध्यक्ष पदमा निलम वैद्यले ९१६ मत ल्याएर राधिका सामरी पाण्डे एक सय ३५ मतमा सीमित बनेकी छन् ।

उपाध्यक्षमा वाणिज्यतर्फ राज् अधिकारी, उद्योगतर्फ दीपक उप्रेती, एशोसिएटतर्फ उज्ज्वल चौलागाई र बस्तुगततर्फ काव्यर्माण अधिकारी निर्वाचित भएका छन् ।

उद्योगतर्फको उपाध्यक्षमा दिपक उप्रेती २७२ मतसहित विजयी भए भने उनका प्रतिस्पर्धी रविन्द्रप्रसाद घिमिरेले २४० मत प्राप्त गरे । सदस्यमा कृष्ण गोपाल महर्जन, जगदिश दहाल, र भुपेन्द्र प्रसाद अधिकारी विजयी भए । महर्जनले २८८, दहालले २७३, र अधिकारीले ३०७ मत प्राप्त गरे । महिला आरक्षणको सदस्यमा सिता देवी भेटवाल विजयी भइन् ।

वाणिज्यतर्फ उपाध्यक्षमा राजु अधिकारी ५९९ मतसहित विजयी हुँदा उनका प्रतिद्वन्द्वी रामप्रसाद न्यौपानेले ४८४ मत प्राप्त गरे । सचिवमा कुलप्रसाद चौलागाईंले ६८४ मत ल्याएर दिवस पराजुलीलाई २७३ मतले हराए । वाणिज्यतर्फ सदस्य पदमा बालकृष्ण बजगाईं, सन्तोष घिमिरे, विष्णुप्रसाद दाहाल, र राजेन्द्र लामिछाने विजयी भएका छन् ।

संघको एशोसिएट उपाध्यक्षमा उज्ज्वल चौलागाई निर्वाचित भए । उनले ४८ मत पाए । उनको प्रतिद्वन्द्वी विष्णु खनाललु ३३ मत मात्रै ल्याए । एशोसिएटतर्फको सदस्यमा नवराज खतिवडा ६४ मत र अंकिता सुमार्गी ५४ मतसहित विजयी हुँदा ३८ मत प्राप्त गरी पुजन विडारी पराजित भए ।

वस्तुगततर्फ उपाध्यक्षमा काव्यर्माण अधिकारी निर्वाचित भएका छन् । वस्तुगततर्फ २७ मतमध्ये २६ मत खसेकोमा अधिकारीले १५ मत पाए । उनको प्रतिद्वन्द्वी प्रदीप अर्यालदे ११ मत मात्रै पाए ।

वस्तुगत सचिवमा नेत्रप्रसाद खतिवडा र राजाराम कार्कीबीच १३-१३ मतसहित बराबरी भएको छ । शपथ ग्रहण कार्यक्रममा गोलाप्रथाबाट विजेता चयन गरिने निर्वाचन समितिले जानकारी दिएको छ । वस्तुगत सदस्यमा शम्भु पुडासैनी १२ मतसहित विजयी भए । ११ मतसहित कृष्ण अर्याल र ३ मतसहित गोविन्द चौलागाई पराजित हुन पुगे ।