पर्सा | पर्साको जिराभवानी गाउँपालिका वार्ड नम्बर १, पकडीटोलमा आज निःशुल्क स्वास्थ्य परीक्षण तथा औषधि वितरण कार्यक्रम सम्पन्न भएको छ। थारु सम्बत २६४८ माघी खिचडीको अवसरमा युवा समाज पकडीटोलको आयोजनामा, निलकण्ठ हस्पिटल एन्ड रिसर्च सेन्टर बीरगंज र नेशनल हेल्थ केयर, ओपल फार्मा, केस्ट फार्मा, हिमालय फार्मा, एस्लोन फार्मा, कलारडेक्स फार्मा, टाईम्स फार्मा, अल्कोम फार्मा लगायत बीरगंजका औषधि सहयोगी संस्थाहरूको सहकार्यमा कार्यक्रम सम्पन्न भएको हो।

कार्यक्रममा ५८५ जनाको निःशुल्क स्वास्थ्य परीक्षण, आँखाको जाँच तथा औषधि वितरण गरिएको थियो। युवा समाज पकडीटोलका अध्यक्ष गोबिन्द चौधरीको अगुवाइमा र निलकण्ठ हस्पिटल एन्ड रिसर्च सेन्टरका एमडी कुनाल महतो थारुको प्रमुख आतिथ्यतामा कार्यक्रम सम्पन्न भएको थियो। शिविरमा डा. अच्युतानन्द लाल कर्ण, डा. अर्पना यादव, डा. पप्पु कुमार जैसवाल, डा. स्वेता चौधरी कर्ण, डा. राजिव यादव, डा. अरबिन्द साह, र डा. अशोक कुमार गुप्ताले स्वास्थ्य परीक्षण गरेका थिए।

यसैगरी, माघी खिचडी विशेष कार्यक्रम अन्तर्गत आगामी सोमबार रक्तदान कार्यक्रम र मंगलबार खिचडी विशेष कार्यक्रममा स्थानीय कलाकारहरूको नृत्य कार्यक्रम हुने युवा समाजका अगुवा कार्यकर्ता नन्दकिशोर दासले जानकारी दिए।

कार्यक्रममा जिराभवानी गाउँपालिका वार्ड नम्बर १ का वार्ड अध्यक्ष रामशरण खवास थारु, वार्ड नम्बर २ का वार्ड अध्यक्ष महादेव महतो थारु, युवा समाज पकडीटोलका युवा प्रतिनिधि र बुद्धिजीवीहरूको उल्लेखनीय सहभागिता रहेको थियो।

यस प्रकारका कार्यक्रमहरूले समुदायको स्वास्थ्य सेवामा पहुँच बढाउने र जनचेतना अभिवृद्धि गर्ने विश्वास गरिएको छ।