बारा । महागढीमाई नगरपालिका र जनजागरण युवा क्लब बाराको संयुक्त आयोजनामा गढीमाई मन्दिर प्रांगणमा बुधबार रक्तदान कार्यक्रम सम्पन्न भएको छ। जनजागरण युवा क्लब बाराले आफ्नो २७ औं वार्षिकोत्सवको अवसरमा कार्यक्रम आयोजना गरेको हो।

कार्यक्रमको उद्घाटन गर्दै महागढीमाई नगरपालिकाका नगर प्रमुख उपेन्द्र प्रसाद यादवले रगतको अभावका कारण अकालमा ज्यान गुमाउनुपरेको अवस्थालाई रोक्न रक्तदानले महत्वपूर्ण भूमिका खेल्ने बताउनुभयो। उहाँले सुत्केरी महिला, दुर्घटनामा परेका व्यक्ति र शल्यक्रिया गराइरहेका बिरामीहरूलाई रगतको अभावले मृत्युको मुखमा पुग्नुपर्ने अवस्थालाई रोक्न रक्तदानले सहयोग गर्ने कुरा जोड दिनुभयो।

नगर प्रमुख यादवले मानव कल्याणका लागि जनजागरण युवा क्लब बारासँग सहकार्य गर्दै महागढीमाई नगरपालिकाले निरन्तर समाजसेवाका कार्यहरू अघि बढाउने प्रतिबद्धता व्यक्त गर्नुभयो।

ग्रामिण क्षेत्रमा जनचेतनाको प्रयास
जनजागरण युवा क्लब बाराका अध्यक्ष भैयाराम यादवले ग्रामीण भेगमा रक्तदानसम्बन्धी भ्रमहरू चिर्न र जनचेतना फैलाउन कार्यक्रम आयोजना गरिएको जानकारी दिनुभयो। उहाँले ग्रामीण क्षेत्रमा अझै पनि रक्तदान गर्दा कमजोरी आउने र विभिन्न रोग लाग्ने जस्ता गलत मानसिकता रहेको भन्दै यस्ता भ्रम तोड्न क्लबले यो कदम चालेको बताउनुभयो।

रक्तदानमा ५२ जनाको सहभागिता
रक्तदान कार्यक्रममा नगर प्रमुख उपेन्द्र प्रसाद यादवसहित गंगा थापा, रिना कुमारी, मिना गुप्ता, नरेश साह, अवधेश प्रसाद यादव, पवन सहनी र शशिकान्त कुशवाहालगायतले रक्तदान गर्नुभएको थियो।

कार्यक्रममा नवराज घिमिरे, मुन्द्रिका चौरसिया, रमेश सिंह, सुरज गुप्ता, दिलीप कुमार साह, सुरेश यादव, राहुल गुप्ता, प्रकाश गुप्ता, चन्दन साह र राजेश यादवसहित चार महिला सहित कुल ५२ जनाले रक्तदान गरेका थिए।

कार्यक्रमको सहजीकरण लक्ष्मी खरेलले गर्नुभएको थियो भने प्राविधिक सहयोग रक्तसञ्चार केन्द्र वीरगञ्जले उपलब्ध गराएको थियो। कार्यक्रममा जनजागरण युवा क्लब बाराका उपाध्यक्ष राजदेव साह, कोषाध्यक्ष सियाराम यादव र कार्यकारी निर्देशक डा. श्रीनिवास बैठाको पनि उपस्थिति रहेको थियो।

कार्यक्रमले ग्रामीण क्षेत्रमा रक्तदानको महत्त्वबारे सचेतना फैलाउन उल्लेखनीय भूमिका खेलेको आयोजकहरूले विश्वास व्यक्त गरेका छन्।