बारा । भारतको मोतिहारीदेखि बाराको अमलेखगंजसम्म पेट्रोल र मट्टीतेल आयात गर्न पाइपलाइन सञ्चालनमा आएपछि ट्याङ्कर व्यवसायीहरूले आन्दोलनको घोषणा गरेका छन्।
अमलेखगंज पेट्रोलियम ढुवानी व्यवसायी सङ्घ, नेपाल यातायात स्वतन्त्र मजदूर सङ्गठन (अमलेखगंज शाखा), र नेपाल पेट्रोलियम ट्याङ्कर चालक सङ्घले संयुक्त रूपमा बैठक गरेर चरणबद्ध आन्दोलनको कार्यक्रम सार्वजनिक गरेका हुन्।
पुस १३ गतेदेखि माग राखेर आन्दोलनमा उत्रेका व्यवसायीहरूले पुस २३ गतेसम्म समस्या समाधानको आश्वासन पाएपछि आन्दोलन स्थगित गरेका थिए। तर, माग पूरा नभएको भन्दै पुनः आन्दोलन सुरु गर्ने निर्णय भएको हो।
पाइपलाइन सञ्चालनपछि भारतको बरौनीदेखि अमलेखगंजसम्म पेट्रोल र मट्टीतेल ढुवानी गर्दै आएका १०४ वटा ट्याङ्कर विस्थापित भएका छन्। यसले व्यवसायीहरूको रोजगारी गुम्ने र आर्थिक समस्यामा पर्ने चिन्ता थपेको छ।
नेपाल आयल निगम, मधेस प्रादेशिक कार्यालय, अमलेखगंजका प्रमुख प्रलयङ्कर आचार्यका अनुसार, पाइपलाइनमार्फत पेट्रोलियम पदार्थको नियमित आयात सुरु भइसकेको छ। अत्याधुनिक पूर्वाधार निर्माण गरी आयात प्रक्रिया प्रभावकारी बनाइएको छ।
व्यवसायीहरूले विस्थापित ट्याङ्करहरूको रोजगारी सुरक्षित गर्न दीर्घकालीन समाधान खोज्न आग्रह गरेका छन्। उनीहरूले पाइपलाइन सञ्चालनले आफ्नो व्यवसायमा पारेको असरप्रति सरकार र निगमको ध्यानाकर्षण गराउँदै आन्दोलन थालेका छन्।
पाइपलाइनले देशको ऊर्जा आपूर्ति प्रणाली सुदृढ बनाए पनि विस्थापित व्यवसायीहरूको माग सम्बोधन गर्न सरकार र सरोकारवालाबीच तत्काल समाधान खोजिनुपर्ने आवश्यकता देखिएको छ।
