बारा । लोकतान्त्रिक समाजवादी पार्टी (लोसपा) ले महिला संघको केन्द्रिय संयोजकमा मिनु ठाकुरलाई मनोनयन गर्दै संगठन सुदृढीकरणतर्फ ठोस कदम चालेको छ। महोत्तरी गाउँपालिका–१ पर्सा पण्डित टोलमा जन्मिएकी ठाकुरको जीवन संघर्ष, समर्पण र नेतृत्व क्षमताको प्रेरणादायी कथा हो। जनकपुरको रा.रा.ब. क्याम्पसबाट इन्टर पूरा गरेपछि उनले वीरगञ्जको ठाकुर राम क्याम्पसबाट राजनीतिक विज्ञानमा स्नातकोत्तर र हरिखेतान क्याम्पसबाट कानुनमा स्नातक गरेकी छन्।

राजनीतिक यात्राको सुरुवात तत्कालीन तराई मधेस लोकतान्त्रिक पार्टीबाट गरेकी ठाकुरले मधेस आन्दोलनका विभिन्न चरणमा अग्रपंक्तिमा रहेर भूमिका निर्वाह गरिन्। पर्साका आन्दोलनहरूमा नेतृत्वदायी भूमिका खेलेकी उनले पार्टी एकीकरणका प्रक्रियाहरू पार गर्दै राजपा, जसपा हुँदै अहिले लोसपाको एक सशक्त नेतृका रूपमा पहिचान बनाएकी छन्। पार्टीका विभिन्न जिम्मेवारी सम्हाल्दै आएकी ठाकुर हाल केन्द्रिय सह महासचिवको रूपमा सक्रिय छन्।

मिनु ठाकुरको यो मनोनयनलाई पार्टीभित्र सकारात्मक ऊर्जा र प्रेरणाको रूपमा हेरिएको छ। मनोनयन समारोहमा पार्टीका वरिष्ठ उपाध्यक्ष जितेन्द्र सोनल, उपाध्यक्ष डा. आभास लाभ, महासचिवद्वय डा. सुरेन्द्र झा र मनिष मिश्रले खादा र अबिरसहित सम्मान गर्दै उनलाई बधाई दिएका थिए।

ठाकुरप्रति शुभकामना व्यक्त गर्नेहरूमा पार्टीकी केन्द्रिय सदस्य डा. कमरुल्लाह अंसारीले समेत प्रशंसा गर्दै उनलाई कर्मठ र कुशल नेतृका रूपमा वर्णन गरे। उनले ठाकुरको नेतृत्वमा महिला संघले थप सुदृढीकरण प्राप्त गर्ने विश्वास व्यक्त गरे।

मिनु ठाकुरको नेतृत्वले महिला संघलाई प्रभावकारी रूपमा अघि बढाउने र महिला सदस्यहरूको सशक्तिकरणमा नयाँ ऊर्जा थप्ने अपेक्षा गरिएको छ। संगठन निर्माणमा उनको निरन्तर योगदानले पार्टीभित्र महिला सहभागिता र नेतृत्वको नयाँ मापदण्ड स्थापित गर्ने विश्वास गरिएको छ।

यस मनोनयनले महिलाहरूलाई राजनीति र सामाजिक अभियानमा थप सक्रिय बनाउन प्रेरणा दिनेछ भने संगठनको सुदृढीकरणतर्फको यात्रा थप सशक्त हुनेछ। पार्टीका सदस्यहरू तथा नेताहरूले यो कदमलाई लोसपाको संगठनात्मक विकासमा महत्त्वपूर्ण योगदानका रूपमा लिएका छन्।