वीरगञ्ज । अमेरिकाका ३९औँ राष्ट्रपति तथा मानवतावादी व्यक्तित्व जिमी कार्टरको सय वर्षको उमेरमा निधन भएको छ ।
विश्वभर आफ्नो योगदानका लागि परिचित कार्टरको निधन गए राति जर्जियाको प्लेन्सस्थित आफ्नै निवासमा भएको हो । कार्टरलाई करिब २२ महिनाअघि होस्पिस केयरमा राखिएको थियो ।
कार्टरले १९७७ देखि १९८१ सम्म अमेरिकाको राष्ट्रपति पद सम्हालेका थिए । आफ्नो कार्यकालपछि उनले मानव अधिकार, रोग उन्मूलन, शान्ति स्थापना, र निष्पक्ष निर्वाचनको प्रवर्द्धनमा विश्वव्यापी योगदान गरेका थिए ।
कार्टर सेन्टरमार्फत उनले नेपालमा समेत सहयोग गरेका थिए । उनले २०६४ सालमा नेपालको संविधान सभाको निर्वाचन अनुगमन गरेका थिए र विभिन्न समयमा नेपाल भ्रमण गरेका थिए ।
अमेरिकाका वर्तमान राष्ट्रपति जो बाइडेनले कार्टरलाई असाधारण नेता, राजनीतिज्ञ र मानवतावादीको रूपमा स्मरण गर्दै आफ्नो प्रिय मित्र गुमाएको उल्लेख गरेका छन् । बाइडेनले भने, “जिमी कार्टरले आफ्नो जीवन उद्देश्यपूर्ण र अर्थपूर्ण बनाएका थिए । उनको जीवन सिद्धान्त, विश्वास र नम्रताको उदाहरण हो ।”
कार्टरको निधनमा विश्वभरबाट श्रद्धाञ्जलीका सन्देशहरू आइरहेका छन् । वासिङ्टनमा उनलाई राजकीय सम्मानका साथ अन्त्येष्टि गरिने छ ।
कार्टरको निजी जीवन पनि प्रेरणादायक थियो । उनी व्यापारी, नौसेना अधिकारी, राजनीतिज्ञ, लेखक, काठकर्मी र वार्ताकारको भूमिकामा सफल भए । उनी र उनकी पत्नी रोजालिनले आफ्नो जीवनको अधिकांश समय जर्जियाको प्लेन्समा बिताए । रोजालिनको पनि हालै, नोभेम्बर २०२३ मा, ९६ वर्षको उमेरमा निधन भएको थियो ।
जिमी कार्टरको मृत्युसँगै विश्वले एक असल नेता र मानव सेवक गुमाएको छ । उनले आफ्नो कार्य, धार्मिक विश्वास र विलक्षण कार्यशैलीका माध्यमबाट राजनीतिक धारणा र मानवतावादी सोचलाई नयाँ दिशा दिएका थिए ।
