वीरगञ्ज । पूर्व गृहमन्त्री तथा राष्ट्रिय स्वतन्त्र पार्टी (रास्वपा) का सभापति तथा निलम्बित सांसद रवि लामिछानेविरुद्ध सहकारी ठगी, सम्पत्ति शुद्धीकरण, र सङ्गठित अपराधसम्बन्धी मुद्दामा बयान प्रक्रिया जारी छ ।

कास्की जिल्ला अदालतमा बिहीबारदेखि सुरु भएको बयान शुक्रवार पनि जारी रहनेछ । न्यायाधीश नितिज राईको इजलासमा बिहीबार दुई घण्टासम्म बयान चलेको कास्की अदालतका सूचना अधिकारी सुरज अधिकारीले जानकारी दिए ।

लामिछानेविरुद्धको सुनुवाइ सोमबार र मङ्गलवारका लागि तय गरिएको थियो । तर, अदालतको व्यस्तताका कारण पालो नआएपछि बयान प्रक्रिया स्थगित भएको थियो । बिहीबारबाट सुरु भएको सुनुवाइ शुक्रवार पनि जारी राखिने भएको छ । लामिछानेविरुद्ध आरोपित मुद्दाहरूको टुङ्गो लगाउन धरौटीमा रिहा गर्ने वा पुर्पक्षका लागि थुनामा पठाउने भन्ने विषयमा अदालतले निर्णय लिनेछ ।

सरकारी वकिलको कार्यालय, कास्कीले रवि लामिछानेसहित छविलाल जोशी, लीला पछाईं, गोर्खा मिडियाका अध्यक्ष जीवी राईलगायत १९ जनाविरुद्ध सहकारी ठगी र सम्पत्ति शुद्धीकरणसम्बन्धी मुद्दामा अभियोग पत्र दर्ता गरेको छ । सुर्यदर्शन सहकारीका निक्षेप रकमको अपचलन गरेको आरोपमा १ अर्ब ५१ करोड रुपैयाँ अपचलन गरिएको प्रहरी अनुसन्धानबाट देखिएको छ ।

सुर्यदर्शन सहकारीबाट अपचलित रकममध्ये ५ करोड ४८ लाख गोरखा मिडिया नेटवर्कमा लगानी गरिएको पुष्टि भएको प्रहरीको दाबी छ । लामिछाने गत कात्तिक २ गते काठमाडौँबाट पक्राउ परेका थिए । सरकारको दाबी अनुसार, उनले सहकारीका सदस्यहरूको रकमको दुरुपयोग गरेर आफ्नो व्यक्तिगत लाभका लागि चलखेल गरेका छन् ।

रवि लामिछानेसहित छविलाल जोशी, जीवी राई, र लीला पछाईंमाथि तीन प्रमुख कसुरको आरोप लगाइएको छ । सहकारी ठगी, सम्पत्ति शुद्धीकरण, र सङ्गठित अपराधसम्बन्धी अभियोगमा उनीहरूमाथि मुद्दा दायर गरिएको छ । साथै, जीवी राई र लीला पछाईंमाथि राष्ट्र बैंक ऐन अन्तर्गत पनि कारबाही माग गरिएको छ । प्रहरीको प्रारम्भिक रायमा ६५ जना प्रतिवादी रहेका थिए, तर सरकारी वकिलको कार्यालयले प्रतिवादी सङ्ख्या घटाएर ४९ जनालाई मात्र मुद्दा दायर गरेको हो ।

कास्की जिल्ला अदालतमा बयानका क्रममा प्रतिवादीहरूले सहकारी बचत अपचलनमा आफ्नो भूमिकाबारे विवरण प्रस्तुत गरिरहेका छन् । सहकारी ठगी मुद्दामा सरकारी वकिलले लामिछानेसहित अन्य प्रतिवादीहरूलाई कडा कारबाहीको माग गरेका छन् । अदालतले बयान र सुनुवाइ प्रक्रियापछि प्रतिवादीहरूलाई धरौटी, साधारण तारेख, या पुर्पक्षका लागि थुनामा पठाउने निर्णय लिनेछ ।

सुर्यदर्शन सहकारी प्रकरणमा लामिछानेको संलग्नताको विषयलाई लिएर प्रहरी र सरकारी वकिलको अनुसन्धानले यो घटनालाई गम्भीर अपराधको रूपमा चित्रित गरेको छ । १८ असोज २०८० मा जीवी राईको समूहविरुद्ध प्रारम्भिक मुद्दा दायर भएको थियो । गत शुक्रवार मात्र गोर्खा मिडियाका अध्यक्ष जीवी राईसहित १९ जनाविरुद्ध पूरक अभियोग पत्र दर्ता गरिएको छ । लामिछानेलाई पक्राउ गरिएको ९२औँ दिनमा मुद्दा दायर भएको हो ।

सरकारको दाबी अनुसार, सहकारी सदस्यहरूको विश्वासको दुरुपयोग गर्दै उनीहरूले ठूलो आर्थिक हिनामिना गरेका छन् । सुर्यदर्शन सहकारीका सदस्यहरूले लामो समयदेखि न्यायका लागि सङ्घर्ष गरिरहेका छन् । यस प्रकरणको टुङ्गो लगाउन अदालतले गरिने निर्णयले आगामी दिनका लागि महत्त्वपूर्ण नजिर कायम गर्ने अपेक्षा गरिएको छ ।