वीरगञ्ज । पर्सा जिल्लाको सखुवा प्रसौनी गाउँपालिका–१ सिद्धपुरस्थित फुटबल मैदानमा चौथो गोल्ड कप फुटबल प्रतियोगिताको उद्घाटन भएको छ। श्री बनशक्ति युवा क्लब सिद्धपुरको आयोजनामा भएको प्रतियोगिताको उद्घाटन सखुवा प्रसौनी गाउँपालिका–६ लखनपुर निवासी नेकपा (माओवादी केन्द्र) पर्साका नेता तथा पर्सा क्षेत्र नं. ३ (क) का प्रदेश सभा सदस्य प्रत्याशी शिवकुमार साह तेलीले गरेका हुन्।

उद्घाटन समारोहमा प्रमुख अतिथि साहले खेलकुद मनोरञ्जन र अनुशासनका लागि मात्र नभई शारीरिक तथा मानसिक स्वास्थ्यका लागि महत्वपूर्ण रहेको बताए। उनले भने, “खेलले हाम्रो जीवनशैलीलाई अगाडि बढाउनुका साथै हामीलाई स्वस्थ राख्न मदत गर्दछ। खेलकुदको प्रवर्द्धनका लागि स्थानीय तह र गाउँपालिकाले युवाहरुलाई प्रोत्साहन गर्नुपर्ने आवश्यकता छ।”

उद्घाटनपछि भएको पहिलो खेलमा निचुटा, पर्सा र बकुलिया, बारा बीच प्रतिस्पर्धा भएको थियो। खेलको पहिलो हाफमा बकुलिया बाराले अग्रता लिए पनि निचुटा, पर्साले बराबरी गोल गर्न सफल भयो। दोस्रो हाफको पन्ध्रौं मिनेटमा बकुलिया बाराले थप एक गोल गर्दै २-१ को जीत हात पारेको छ। खेलमा बकुलिया बाराका जर्सी नम्बर ७ का अजय चौधरी उत्कृष्ट खेलाडी घोषित भए। उनलाई नगद, शिल्ड र मेडलसहित प्रमुख अतिथि शिवकुमार साह तेलीले सम्मानित गरे।

प्रतियोगितामा ८ वटा क्लबले सहभागिता जनाएका छन्। खेल एक हप्तासम्म सञ्चालन हुनेछ। समापन समारोह आउँदो पुस १४ गते हुनेछ। विजेता टोलीले शिल्ड, मेडल, प्रमाणपत्रसहित नगद रु. १० हजार प्राप्त गर्नेछ भने उपविजेताले नगद रु. ५ हजार ५५५ पाउनेछ। आजको खेल देकुली, पर्सा र वीरगञ्ज, पर्साबीच हुने आयोजकले जानकारी दिएको छ।

कार्यक्रम पूर्व गाविस अध्यक्ष लालदेव महतो उरावको अध्यक्षतामा सम्पन्न भएको थियो। कार्यक्रममा ईलाका प्रहरी कार्यालय, एकटंगाका प्रमुख प्रहरी नायब निरीक्षक योगानन्द साह, शसस्त्र प्रहरी बल, बागेश्वरी तित्रौनाका शसस्त्र प्रहरी निरीक्षक चामनारायण महतो, पूर्व वडा सदस्य रामाखा थारु, पारस महतो, शिवनाथ थारु, नेकपा (माओवादी केन्द्र)का प्रदीप चौधरी, हटन चौधरी, बिगा महतो, सिकेन्द्र सहनी र बमबहादुर पण्डितलगायतको उपस्थिति रहेको थियो।

कार्यक्रममा स्वागत मन्तव्य सिद्धपुर विद्यालयका प्रधानाध्यापक प्रदीप कुमार चौधरीले व्यक्त गरेका थिए भने सहजीकरण नरेश प्रसाद उरावले गरेका थिए।