वीरगञ्ज। नेपाल चिकित्सक सङ्घले पर्साका प्रमुख जिल्ला अधिकारी (सिडिओ) गणेश अर्यालको विवादास्पद अभिव्यक्तिप्रति कडा आपत्ति जनाउँदै उनलाई जिम्मेवारीबाट हटाउन र कारबाही गर्न माग गरेको छ।
सङ्घले गृहमन्त्रीलाई बुझाएको ज्ञापनपत्रमा सिडिओ अर्यालको अभिव्यक्तिले कानुन पालन गर्ने पदाधिकारीको भूमिकामाथि गम्भीर प्रश्न उठाएको उल्लेख छ। सङ्घका अध्यक्ष डा. अनिल विक्रम कार्की र महासचिव डा. सञ्जीव तिवारीद्वारा हस्ताक्षरित पत्रमा उक्त टिप्पणी अनुचित, उत्तेजना फैलाउने र स्वास्थ्यकर्मीमाथि आक्रमणलाई प्रोत्साहन गर्न सक्ने आरोप लगाइएको छ।
कार्तिक ३० गते वीरगञ्जमा आयोजित कार्यक्रममा सिडिओ अर्यालले बुटवलको आम्दा अस्पतालमा भएको घटनाको प्रसङ्ग उल्लेख गर्दै, बिरामीको पक्षमा भएको भए अस्पतालमा आगो लगाउनुपर्ने टिप्पणी गरेको एक भिडियो सार्वजनिक भएपछि विवाद चुलिएको हो।
सङ्घले सिडिओको भनाइ राष्ट्रसेवकको भूमिकासँग मेल नखाने र स्वास्थ्यकर्मीको मनोबल गिराउने उल्लेख गरेको छ। मधेश प्रदेश संयोजक डा. नीरज कुमार सिंहले यस्तो प्रवृत्तिले स्वास्थ्य क्षेत्रमा गम्भीर असर पर्ने चेतावनी दिएका छन्।
सङ्घले स्वास्थ्य संस्थामाथिको आक्रमण रोक्न र स्वास्थ्यकर्मीको सुरक्षाका लागि कानुनको प्रभावकारी कार्यान्वयन गर्न माग गरेको छ। यदि सिडिओलाई जिम्मेवारीमुक्त नगरे कारबाहीका लागि थप कडा कदम चालिने सङ्घले चेतावनी दिएको छ।
सिडिओ अर्यालले भने आफ्नो भनाइलाई तोडमोड गरी गलत अर्थमा प्रस्तुत गरिएको दाबी गर्दै चिकित्सकप्रति पूर्ण सम्मान रहेको र स्वास्थ्यकर्मीको पक्षमा रहेको बताएका छन्। यद्यपि, सङ्घले गम्भीर कदम चाल्न सरकारलाई दबाब दिइरहेको छ।
