वीरगञ्ज | पर्सा जिल्लामा सशस्त्र प्रहरीले भन्सार छल्दै भारतबाट अवैध रूपमा ल्याइएका विभिन्न सामानहरू नियन्त्रणमा लिएको छ।

सशस्त्र प्रहरी बल नेपाल, नम्बर १३ गण हे.क्वा. पर्साबाट स.प्र.नि. आन बहादुर गुरुङको नेतृत्वमा गण्डकस्थित चेकपोस्टमा खटिएको टोलीले रु ७९,८०० बराबरको किराना सामान बरामद गरी वीरगञ्ज भन्सार कार्यालयमा बुझाएको छ।

त्यसैगरी, सशस्त्र प्रहरी गुल्म वीरगञ्जबाट खटिएको अर्को टोलीले बि.म.न.पा– १६ स्थित भन्सार मेनगेट र सीमावर्ती नाकाहरूमा चेकजाँच गर्दा रु.१८,२६,५४७ बराबरका मोटर पार्ट्स, सामान्य औषधि, मोबाइल एसेसरिज, जुत्ता र किराना सामान बरामद गरेको छ। साथै, ना १० प ६६९६ नम्बरको मोटरसाइकलसमेत नियन्त्रणमा लिएर भन्सार कार्यालयमा बुझाइएको छ।

सशस्त्र प्रहरी गुल्म अलौबाट खटिएको टोलीले बि.म.न.पा– १७ कोनियामा चेकजाँच गर्दा पुराना ब्याट्री र गाडीका पार्टपुर्जालगायतका रु. ५,०३,००० बराबरको कबाडी सामान बरामद गरेको छ।

यस्तै, ई–रिक्साको प्रयोग गरेर भन्सार छल्ने प्रयास पनि असफल पारिएको छ। बि.म.न.पा– १६ स्थित भन्सार मेनगेटमा चेकजाँच गर्दा छपकैया निवासी मनोज साह सोनारले फल्स बटम भएको ई–रिक्सामा लुकाएर ल्याएका रु.१,६७,५०० बराबरका कपडा बरामद गरिएको छ। उक्त ई.रिक्सा रु. ३,००,००० मूल्याङ्कन गरी सामानसहित भन्सार कार्यालयमा बुझाइएको सशस्त्र प्रहरीले जानकारी दिएको छ।

बि.ओ.पि. सिसारियाबाट खटिएको अर्को टोलीले छपकैयामा चेकजाँच गर्दै रु.७३,००० बराबरका कपडा बरामद गरेको छ।

सशस्त्र प्रहरी नायब उपरीक्षक बिष्णु हरी घिमिरेका अनुसार भन्सार छल्दै ल्याइएका अवैध सामान नियन्त्रण अभियान निरन्तर रूपमा जारी छ। उनले सीमावर्ती क्षेत्रमा चेकजाँच कडा पारिएको र अवैध क्रियाकलापलाई रोक्न सशस्त्र प्रहरी बल प्रतिबद्ध रहेको बताए।