काठमाडौं । नेपालका अन्तर्राष्ट्रिय ख्यातिप्राप्त कलाकार अशेष डंगोल दुई महिनाको सांगितिक यात्रापछि अमेरिकाबाट नेपाल फर्किएका छन्। “हिमालयन हेन्ड्रीक्स” को उपनामले चिनिने डंगोलले अमेरिकाका विभिन्न स्थानमा दमदार सांगीतिक प्रस्तुति दिएका थिए।
डंगोलले आर्लिङ्टन (भर्जिनिया), ह्युस्टन (टेक्सास), हन्ट्सभिल (अलाबामा), टुपेलो (मिसिसिपी), पिट्सवर्ग (क्यालिफोर्निया), एल सेरीटो (क्यालिफोर्निया), र लङ बीच (क्यालिफोर्निया) मा सांगीतिक कार्यक्रम प्रस्तुत गरेका थिए। उनले “हाउस अफ ब्लूज” को फाउन्डेसन रुममा दोस्रो पटक आफ्नो प्रस्तुति दिएका थिए, जहाँ उनलाई चर्चित संगीत निर्देशक रेन्दा ज्याक्सन (बेस गिटार) र साजन महर्जन (ड्रम्स) ले साथ दिएका थिए।
विशेष च्यारिटी कन्सर्ट
पिट्सवर्ग, क्यालिफोर्नियामा बन्दै गरेको श्री लक्ष्मी वैकुण्ठनाथ नेपाली मन्दिरको सहयोगार्थ डंगोलले “हिलीङ सेसन” नामक च्यारिटी कन्सर्टको आयोजना गरे। कन्सर्टमा दर्शकहरूले डंगोलको अध्यात्मिक संगीत सुन्दै ध्यानसमेत गरेका थिए।
नेपाली समुदायको उत्साह
सगरमाथा इन्टरटेनमेन्टद्वारा आयोजित कार्यक्रमलाई नेपाली समुदायले अत्यधिक समर्थन गरेका थिए। विशेषतः एल सेरीटोस्थित “लामा वार” मा आयोजना गरिएको कार्यक्रममा उल्लेखनीय सहभागिता देखिएको थियो।
प्रबन्धकीय भूमिका र सहयोग
यस सांगितिक यात्रामा क्यालिफोर्नियावासी पिउस दाहाल भ्रमण प्रबन्धक थिए भने अमर क्षेत्री फाउन्डेसनले मुख्य प्रायोजन गरेको थियो। नेपक्याली रेकर्ड्स, अर्पण कार्की, अभिषेक डंगोल, मनोज लामिछाने र तिका राईलगायतले सह-प्रबन्धन र आवास व्यवस्थापनमा योगदान पुर्याएका थिए।
अशेष डंगोलको सांगितिक यात्रा
छ वटा गीति एल्बम सार्वजनिक गरिसकेका डंगोलले १३ भन्दा बढी देशमा सांगीतिक यात्रा गरी विश्वभर नेपाली संगीतको पहिचान दिलाएका छन्। अमेरिकामा सांगितिक यात्रा सम्पन्न गरेपछि उनी नेपाल फर्किएका छन्।
डंगोलको यस सांगितिक यात्राले नेपाली संगीतको अन्तर्राष्ट्रिय स्तरमा प्रचारमा थप योगदान पुर्याएको छ।
