वीरगञ्ज । आगामी मंसिर १६ गते देशभरका विभिन्न स्थानीय तहका रिक्त पदमा उपनिर्वाचन हुने भएको छ। कुल ४४ पदमा हुने यो उपनिर्वाचनमा जिल्ला समन्वय समिति प्रमुख, गाउँपालिका अध्यक्ष, उपाध्यक्ष, नगरप्रमुख, उपप्रमुख, र वडाध्यक्ष पदहरू समावेश छन्।

निर्वाचन आयोगका अनुसार ओखलढुङ्गा र कैलालीका जिल्ला समन्वय समिति प्रमुख, काठमाडौंको कीर्तिपुर नगरप्रमुख, जाजरकोटको नलगाड नगरपालिकाका उपप्रमुख, मोरङको ग्रामथान र दैलेखको महाबु गाउँपालिका अध्यक्ष पदका लागि उपनिर्वाचन हुनेछ। यस्तै, दोलखाको गौरीशंकर, हुम्लाको सर्केगाड, बाजुराको स्वामीकार्तिक खापर गाउँपालिकाका उपाध्यक्ष पदमा पनि निर्वाचन हुने आयोगले जनाएको छ।

कुल ३४ वडाध्यक्ष पदको लागि पनि निर्वाचन हुने छ, जसमा सिरिजङ्गा, कन्काई, लालीगुराँस, गढी, मोलुङ, त्रियुगा, बेलका, डाक्नेश्वरी, धनुषाधाम, रामगोपालपुर, ईशनाथ, राजपुर, गढीमाई, ककनी, हेटौँडा, गोरखा, मुसिकोट, रुन्टीगढी, ठाकुरबाबा, पुथा उत्तरगङ्गा, शुद्धोधन, दुल्लु, तिलागुफा, कुशे, त्रिपुरासुन्दरी, सानीभेरी, सुर्मा, पूर्वीचौकी, दुहुँ, भीमदत्त नगरपालिकाका वडाध्यक्ष पद रहेका छन्।

उम्मेदवारी दर्ता मंसिर २ मा
निर्वाचन आयोगले मंसिर २ गते उम्मेदवारका लागि उम्मेदवारी दर्ताको समय तोकेको छ। बिहान १० बजेबाट अपराह्न ५ बजेसम्म उम्मेदवारी दर्ता खुला रहनेछ भने साँझ ५ देखि ६ बजेसम्म उम्मेदवारहरूको सूची प्रकाशन गरिनेछ। मंसिर ३ गते विरोध उजुरी दिने समय दिइनेछ, जसको जाँचबुझ गरेर मंसिर ४ गते उम्मेदवारको नामावली प्रकाशित गरिनेछ। मंसिर ५ गते उम्मेदवारले आफ्नो नाम फिर्ता लिन सक्नेछन् भने सोही दिन उम्मेदवारहरूलाई निर्वाचन चिह्न प्रदान गरिनेछ।
खर्च सीमा
निर्वाचन आयोगले उम्मेदवारहरूलाई आ-आफ्नो पदको आधारमा खर्च सीमा तोकेको छ। नगरप्रमुख तथा उपप्रमुखका उम्मेदवारले चार लाख ५० हजार, गाउँपालिका अध्यक्ष तथा उपाध्यक्षका उम्मेदवारले तीन लाख ५० हजार, जिल्ला समन्वय समितिका प्रमुख तथा उपप्रमुखका उम्मेदवारले ५० हजार, नगरपालिकाका वडाध्यक्षले दुई लाख र गाउँपालिकाका वडाध्यक्षले एक लाख ५० हजारसम्म खर्च गर्न सक्नेछन्।

२५ दलको सहभागिता
उपनिर्वाचनमा नेपाली कांग्रेस, नेकपा एमाले, नेकपा माओवादी केन्द्र, राष्ट्रिय स्वतन्त्र पार्टी, नेकपा एकीकृत समाजवादी, जनता समाजवादी पार्टी नेपालसहित २५ दलले सहभागिता जनाउने छन्। आयोगमा दर्ता भएका २६ दलमध्ये २५ दलले रीत पूरा गरेका छन्।