वीरगञ्ज । भारतको प्रसिद्ध लोक गायिका र पद्म पुरस्कारबाट सम्मानित शारदा सिन्हाको निधन भएको छ ।
मङ्गलवार साँझ दिल्ली एम्स अस्पतालमा उनले अन्तिम सास फेरिन् । सोमबार साँझ अचानक स्वास्थ्यमा गम्भीर समस्या आएपछि उनलाई भेन्टिलेटरमा राखिएको थियो । मङ्गलवार साँझ उनले आफ्नो जीवनको अन्तिम सास लिएसँगै उनको निधनको खबरले उनका प्रशंसकहरूलाई स्तब्ध बनाएको छ ।
छठ पर्वको चहलपहलमा शारदा सिन्हाका गाएका छठ गीत चारैतिर सुनिन्थे । यस्तो बेला उनको निधनको खबरले भारतको बिहार, उत्तर प्रदेश, झारखण्ड, दिल्ली लगायतका स्थान र नेपालको तराई-मधेस क्षेत्रका उनका प्रशंसकमा गहिरो शोकको लहर फैलिएको छ ।
दिल्ली एम्समा लिइन् अन्तिम सास
७२ वर्षीय शारदा सिन्हाको स्वास्थ्यमा केही समयदेखि समस्या देखिएको थियो । उनलाई गत महिना स्वास्थ्य बिग्रिएपछि दिल्लीको एम्स अस्पतालमा भर्ना गरिएको थियो । सुरुमा आइसियुमा उपचार गराइरहेकी सिन्हाको स्वास्थ्यमा सुधार देखिएपछि प्राइभेट वार्डमा सारिएको थियो । तर, सोमबार साँझ अचानक स्वास्थ्य स्थिति गम्भीर बनेपछि उनलाई भेन्टिलेटरमा राख्नु परेको थियो । उनका छोरा अंशुमनले सामाजिक सञ्जालमार्फत आमाको स्वास्थ्य सम्बन्धी जानकारी दिँदै आएका थिए । सङ्क्रमणका कारण स्वास्थ्य अवस्था बिग्रँदै गएपछि उनले भेन्टिलेटरमा राख्न परेको जानकारी दिएका थिए ।
प्रशंसकहरूमा शोकको लहर
उनका प्रशंसकहरूले शारदा सिन्हा पुनः स्वस्थ भएर फर्किने आशा राखेका थिए । उनी मृत्युको सङ्घर्षलाई जित्नेछिन् भन्ने विश्वास थियो । तर, अन्ततः उनले जीवनलाई अलबिदा गरिन् । सामाजिक सञ्जालमा उनका प्रशंसकहरूले श्रद्धाञ्जली व्यक्त गरिरहेका छन् । विशेष गरी छठ पर्वको समय उनको निधनले धेरैलाई भाव विह्वल बनाएको छ । यद्यपि, शारदा सिन्हा आफ्नो कालजयी गीतहरूको माध्यमबाट सदैव प्रशंसकहरूको मनमा जीवित रहनेछिन् ।
भर्खरै पति गुमाएकी थिइन्
शारदा सिन्हाले केही समय अघि मात्र आफ्ना पति गुमाएकी थिइन् । उनको पतिको निधन ब्रेन ह्यामरेजका कारण भएको थियो । यसै वर्ष उनले आफ्ना पतिसँग विवाहको ५४ औँ वर्षगाँठ मनाएकी थिइन् । छठ गीतहरूको माध्यमबाट लोक सङ्गीतमा महत्त्वपूर्ण योगदान पुर्याएकी शारदा सिन्हालाई भारत सरकारले पद्मश्री र पद्मविभूषण जस्ता उच्च सम्मानले सम्मानित गरेको थियो ।
