वीरगंज | सर्लाहीको बरहथवा नगरपालिका–७ मा निर्माणाधीन घरको पर्खाल भत्किँदा एक मजदुरको मृत्यु भएको छ भने एकजना घाइते भएका छन्। आइतबार दिउँसो राजनारायण साहको घर निर्माणका क्रममा भएको यो दुर्घटनामा बसवरिया गाउँपालिका–३, बगलवाका १७ वर्षीय रविन माझीको ज्यान गएको हो। इलाका प्रहरी कार्यालय बरहथवाका प्रहरी नायव उपरीक्षक गौतम खड्काका अनुसार पर्खाल भत्किँदा माझी गम्भीर रूपमा च्यापिएका थिए।
घाइते अवस्थामै उद्धार गरिएका माझीलाई बरहथवा बजारस्थित भेनस अस्पतालमा पुर्याइएको थियो, जहाँ उपचारको क्रममा उनको मृत्यु भएको हो। सोही घटनामा बरवरिया गाउँपालिका–३, क्याम्प चौकका १९ वर्षीय विकास महतो पनि घाइते भएका छन्। महतोको बरहथवास्थित ह्याप्पी अस्पतालमा उपचार भइरहेको छ र उनको अवस्था सामान्य रहेको जनाइएको छ।
दुर्घटनापछि घटनास्थलमा प्रहरी पुगेको र पर्खाल किन भत्किएको भन्नेबारे अनुसन्धान भइरहेको प्रहरी नायव उपरीक्षक खड्काले बताए। भवन निर्माणका क्रममा लापरवाही वा सुरक्षा मापदण्डको अभावमा दुर्घटना भएको हुनसक्ने अनुमान गरिएको छ।
स्थानीय बासिन्दाहरूले निर्माण कार्यमा सुरक्षा मापदण्डलाई कडाइका साथ पालना गर्नुपर्ने माग राखेका छन्।
