वीरगंज | तिहारको समयमा औद्योगिक प्रतिष्ठानहरूको बिजुली काटिएको भन्दै जीतपुरसिमरा उद्योग वाणिज्य संघले कडा विरोध जनाएको छ। संघका अध्यक्ष मोहन शर्मा लामिछानेले मंगलवार प्रेस विज्ञप्ति जारी गर्दै उज्यालो पर्व दिपावलीमा उद्योगहरू अन्धकारमा राख्ने नेपाल विद्युत् प्राधिकरणको निर्णय सच्याउन माग गरेका छन्।

संघका अनुसार डेडिकेटेड र ट्रंक लाइनको विवाद पुरानो भए पनि उद्योगीहरूले यसलाई वार्ता र सहमति मार्फत समाधान गर्ने प्रयास गरिरहेछन्। तर, सरकार र प्राधिकरणले उद्योगीहरूको यो प्रयासलाई वेवास्ता गरेको आरोप अध्यक्ष लामिछानेले लगाएका छन्।

विज्ञप्तिमा जीतपुरसिमरा उपमहानगरभित्रका चार ठूला उद्योगहरू—जगदम्बा स्टिल, हुलास स्टिल, हामा आइरन, र अशोक स्टिल—प्रतिकूल परिस्थितिमा परेको उल्लेख छ। “रोजगारी र कुल ग्राहस्थ उत्पादनमा योगदान गर्ने यी उद्योगहरूको बिजुली काट्ने एकपक्षीय निर्णय निन्दनीय छ,” लामिछानेले भनेका छन्।

विज्ञप्तिमा हालको परिस्थितिले उद्योगीमा त्रास फैलाएको र देशमा व्यवसायमैत्री वातावरण निर्माणको सट्टा उद्योगमा आक्रमण भइरहेकाले लगानी पलायनको जोखिम बढेको बताइएको छ।

संघले देशभर बिजुली काटिएका उद्योग प्रतिष्ठानहरूमा विद्युत् पुनःस्थापना गर्न, उद्योगमैत्री वातावरण निर्माण गर्न, र उद्योगहरूको सुरक्षा सुनिश्चित गर्न विद्युत् प्राधिकरणलगायत सम्बद्ध निकायलाई आग्रह गरेको छ।

संघले बिजुली कटौतीको निर्णयले तिहार जस्तो महत्वपूर्ण पर्वमा उद्योगहरूलाई अन्धकारमा राखेर आर्थिक गतिविधिमा नकारात्मक प्रभाव पारेको बताएको छ। विज्ञप्तिमा, उद्योगको दीर्घकालीन सञ्चालनलाई सुनिश्चित गर्न र व्यवसायीहरूको मनोबल उच्च राख्न आवश्यक नीतिगत सुधार गर्न सरकारसँग आग्रह गरिएको छ।

“सरकारले उद्योगहरूलाई चलायमान बनाउन, रोजगारीको अवसर बढाउन र उत्पादन वृद्धिमा योगदान पुर्‍याउन आवश्यक नीतिगत स्पष्टता र सहजीकरणको वातावरण निर्माण गर्नु अनिवार्य छ,” संघले जोड दिएको छ।

उद्योग वाणिज्य संघका अध्यक्ष लामिछानेले प्राधिकरणको एकपक्षीय कदमले केवल उद्योगहरूलाई मात्रै होइन, सम्पूर्ण आपूर्ति श्रृंखलालाई प्रभावित पार्ने बताएका छन्। यो बिजुली कटौतीले स्थानीय समुदायलाई पनि प्रत्यक्ष असर पुर्‍याएको भन्दै, संघले सरकारसँग व्यवसायमैत्री दृष्टिकोण अवलम्बन गर्न आह्वान गरेको छ।

संघले यदि बिजुली आपूर्ति तत्काल पुनःस्थापना नभए थप आन्दोलनका कार्यक्रम घोषणा गर्ने चेतावनीसमेत दिएको छ।