वीरगंज | संघीय मामिला तथा सामान्य प्रशासनमन्त्री राजकुमार गुप्ताले केही महिनाभित्रै सम्पूर्ण स्थानीय तहमा कर्मचारी पठाउने तयारी भइरहेको बताउनुभएको छ। उहाँले मन्त्रालयको नेतृत्व सम्हालेपछि धेरै स्थानीय तहमा कर्मचारी व्यवस्थापन भइसकेको र बाँकी स्थानहरूमा पनि छिट्टै कर्मचारी पठाइने जानकारी दिनुभएको हो।

मन्त्री गुप्ताका अनुसार, मन्त्रालय सम्हालेयता जिल्ला समन्वय समितिमा आवश्यक कर्मचारी र ५७ जिल्लामा प्राविधिक जनशक्ति, विशेषगरी इन्जिनियर, पठाइसकिएको छ। बाँकी रहेका नगर र गाउँपालिकाहरूमा चाँडै कर्मचारी पुर्याइने उहाँको भनाइ छ।

करिब एक दशकदेखि एकै ठाउँमा काम गरिरहेका १,२५८ जना कर्मचारीलाई सरुवा गरी विभिन्न स्थानमा पठाइएको र यो कदमले प्रशासनिक काम चुस्त बनाउन सहयोग पुगेको मन्त्री गुप्ताले बताउनुभयो। उहाँले भने, “विभिन्न तहमा लामो समयदेखि रहेका कर्मचारीलाई सरुवा गरी कार्यक्षमता बढाउने प्रयास गरेका छौँ। नयाँ अफिसर र अधिकृतहरू पनि पालिकामै पठाएका छौँ।”

एकैचोटी ठूलो सङ्ख्यामा कर्मचारी सरुवा गर्दा विभिन्न तहबाट दबाब सामना गर्नुपरेको बताउँदै मन्त्री गुप्ताले काममा आउने दबाबका अगाडि आफू नझुक्ने र मन्त्रालयको सुधार प्रयासमा दृढ रहेको बताउनुभयो।

उहाँले कर्मचारी सरुवासम्बन्धी नियमावली कानुन मन्त्रालयमा राय-सुझावका लागि पठाइएको जानकारी पनि दिनुभयो। साथै, संघीय निजामती विधेयक संसदको आगामी अधिवेशनमा पारित हुने विश्वास व्यक्त गर्दै, १०० दिनको कार्यकालमा थालिएका कामको परिणाम अब क्रमशः देखिने दाबी गर्नुभयो।

मन्त्री गुप्ताले मन्त्रालय सम्हालेको तीन महिनाको अवधिमा संघीय निजामती विधेयकमाथिको छलफललाई तीव्रता दिइएको र आगामी संसद अधिवेशनमा सो विधेयक पारित हुने सम्भावना रहेको बताउनुभयो। उहाँले यी १०० दिनको अवधि मन्त्रालयका गतिविधिहरू बुझ्न, आवश्यक ब्रिफिङ लिन र विभिन्न किसिमका कार्यहरू सुरु गर्न प्रयोग भएको उल्लेख गर्दै अब क्रमशः यसका परिणाम देखिने विश्वास व्यक्त गर्नुभयो।

उहाँका अनुसार, हालसम्म मन्त्रालयले थालिएका सुधारात्मक कार्यहरूलाई पूर्णता दिन सबै तहमा कार्य योजना बनाउँदै गरेको छ। सबै पालिकाहरूमा कर्मचारी व्यवस्थापन भएपछि निमित्तको भरमा चलेका सेवा प्रबन्धनमा सुधार आउने र कर्मचारीहरूको दीर्घकालीन नियुक्तिले सेवा प्रवाहमा थप प्रभावकारिता ल्याउने उहाँको भनाइ छ।

मन्त्री गुप्ताले सिङ्गो सरकारकै गति बढाउने उद्देश्यले मन्त्रालयले चालू आवमा स्थानीय तह र कर्मचारी व्यवस्थापनका थप योजनाहरू अघि बढाइरहेको जानकारी दिनुभयो। मन्त्रालयको सुधार र व्यवस्थापन योजनामा दीर्घकालीन परिणाम आउने अपेक्षा रहेको उहाँले बताउनुभयो।

उहाँले थप्नुभयो, “हामी सबै स्थानीय तहमा कर्मचारी पुर्याउने र सेवा प्रवाह चुस्तदुरुस्त बनाउने हाम्रो प्राथमिकता हो। यसले जनतालाई सेवा प्राप्तिमा सजिलो र सहजता ल्याउनेछ, र कर्मचारीहरूको उचित व्यवस्थापनले प्रशासनिक सुधारमा योगदान पुर्याउनेछ।”

मन्त्रीको यो योजना कार्यान्वयनमा आएपछि स्थानीय तहका सेवाहरूमा सुधारको अपेक्षा गरिएको छ, जसले कर्मचारी व्यवस्थापनमा लामो समयदेखि आएको चुनौतीलाई सम्बोधन गर्नेछ।