वीरगंज । रौतहटको कटहरिया नगरपालिकामा कार्यरत महिला स्वास्थ्य स्वयंसेविकाहरूले १८ महिनादेखि तलब नपाएको भन्दै आन्दोलनको चेतावनी दिएका छन्। मेयर अजय प्रकाश जैसवाल निर्वाचित भएदेखि नै तलब नपाएकोले बाध्य भएर आन्दोलन गर्नुपर्ने अवस्था आएको उनीहरूको भनाइ छ।

दसैँमा तलब नपाउँदा आर्थिक कठिनाइ भोगेका स्वास्थ्य स्वयंसेविकाहरूले अब दीपावली र छठ आउँदै गर्दा पनि तलबको कुनै टुंगो नलागेको गुनासो गरेका छन्। कटहरिया नगरपालिकाका ९ वटै वडामा ५४ जना महिला स्वास्थ्य स्वयंसेविका कार्यरत छन्, तर उनीहरूले १८ महिनादेखि तलब पाएका छैनन्।

पूर्व मेयर सियाराम कुशवाहाले स्वयंसेविकाहरूलाई मासिक ३ हजार रुपैयाँका दरले चौमासिक तलब दिन्थे। मेयर जैसवालले निर्वाचित भएपछिको केही समय ४ हजार ५ सय रुपैयाँका दरले तलब भुक्तानी गरे पनि पछिल्ला १८ महिनादेखि तलब रोकेका छन्।

वडा नम्बर ८ की स्वास्थ्य स्वयंसेविका मिना ठाकुरले मेयरले बारम्बार झुटा आश्वासन मात्र दिँदै आएको बताइन्। असोजमा आन्दोलन गरेपछि मेयरले दसैँअघि नै तलब दिने प्रतिवद्धता जनाएका थिए, जसपछि आन्दोलन स्थगित गरिएको थियो। तर, हालसम्म कुनै खातामा तलब नपुग्दा स्वयंसेविकाहरू पुनः आक्रोशित भएका छन्।

सम्पर्क प्रयास गर्दा मेयर जैसवालसँग सम्पर्क हुन सकेन, भने प्रमुख प्रशासकीय अधिकृत रामजी जोशीले पनि फोन नउठाएको स्वयंसेविकाहरूले जनाएका छन्।

स्वास्थ्य स्वयंसेविकाहरूले आफ्नो तलब सम्बन्धी समस्या समाधान नभए दीपावली र छठपछाडि पुनः आन्दोलनमा जाने चेतावनी दिएका छन्। उनीहरूले नगरपालिकाको लापरबाहीका कारण आफूहरूलाई आर्थिक समस्यामा परेका बताउँदै काम नगर्ने चेतावनीसमेत दिएका छन्।

स्वयंसेविका मिना ठाकुरका अनुसार, तलब नपाउँदा दैनिक खर्च टार्नसमेत कठिनाइ भएको छ। उनीहरूको तलब समयमा नपाउँदा परिवार र समाजमा अपमानित हुनुपरेको उनको गुनासो छ। “हामी जनताको स्वास्थ्य सेवा दिन समर्पित छौँ, तर हाम्रो नैतिकता र अस्तित्वको कदर नगरिँदा कामप्रति निराश भएका छौँ,” ठाकुरले बताइन्।

स्थानीय स्तरमा आधारभूत स्वास्थ्य सेवा प्रदान गर्दै आएका स्वास्थ्य स्वयंसेविकाहरूले अब समस्याबारे प्रदेश र संघीय स्तरसम्म आवाज उठाउने योजना बनाएका छन्। यसै बीच, नगरपालिकाले यस विषयमा उचित सम्बोधन नगरेको र प्रशासनले चुपचाप बसिरहेको आरोप पनि उनीहरूले लगाएका छन्।

नगरपालिकामा स्वास्थ्य सेवामा महत्वपूर्ण भूमिका खेल्ने स्वयंसेविकाहरूको तलब समस्या दीर्घकालीन रूपमा समाधान गर्न स्थानीय सरकारको इच्छाशक्ति आवश्यक भएको उनीहरूले बताएका छन्। यद्यपि, नगरपालिकाबाट यो समस्या समाधानका लागि ठोस पहल नहुँदा स्वयंसेविकाहरू आन्दोलनमा जान बाध्य भएको स्पष्ट छ।