वीरगञ्ज । आगामी दिनमा मौसममा परिवर्तन आउने सङ्केत देखिएको छ । विशेष गरी बुधवारदेखि शनिवारसम्म नेपालका पूर्वी र मध्य भू-भागमा पानी पर्ने अनुमान गरिएको छ ।
कोसीदेखि गण्डकी प्रदेशसम्मका पहाडी क्षेत्रहरूमा हल्कादेखि मध्यम वर्षा हुने सम्भावना रहेको मौसमविद्हरूले बताएका छन् ।
त्रिभुवन विश्वविद्यालयको मौसम विज्ञान केन्द्रीय विभागका सहप्राध्यापक विनोद पोखरेलका अनुसार, यी क्षेत्रहरूमा विशेष गरी बेलुकीपख वर्षा हुने सम्भावना छ । मेघ गर्जन र चट्याङसमेत देखिन सक्ने भएकाले सतर्कता अपनाउन सुझाव दिइएको छ ।
कोसी प्रदेशका केही स्थानमा भारी वर्षा हुने अनुमान गरिएको छ, जसले गर्दा पहिरो र बाढीको जोखिम बढ्न सक्छ । मौसमविद्हरूले आगामी दिनहरूमा लुम्बिनी, कर्णाली र सुदूरपश्चिम प्रदेशमा भने वर्षा नहुने सम्भावना औँल्याएका छन् । यद्यपि, यी प्रदेशहरूमा समेत आंशिक बदली रहने बताइएको छ ।
गत बिहीबारदेखि भएको भीषण वर्षाका कारण कोसीदेखि लुम्बिनी प्रदेशसम्मको क्षेत्रमा ठूलो जनधनको क्षति भएको छ । सरकारी तथ्याङ्क अनुसार, यस प्राकृतिक विपत्तिमा अहिलेसम्म २१७ जनाभन्दा बढीको मृत्यु भइसकेको छ, भने १४३ जना घाइते भएका छन् । त्यस्तै ३१ जना अझै बेपत्ता रहेको अधिकारीहरूले बताएका छन् ।
प्रभावित क्षेत्रहरूमा उद्धार र राहत कार्यहरू जारी छन्, र जनताले अत्यधिक सावधानी अपनाउनुपर्ने भनिएको छ ।
यस्ता प्रतिकूल मौसमको अवस्थालाई ध्यानमा राख्दै, स्थानीय निकायहरूले जोखिमपूर्ण स्थानहरूमा बसोबास गर्ने नागरिकहरूलाई सुरक्षित स्थानतर्फ सार्न निर्देशन दिएका छन् । साथै, बाढी र पहिरो प्रभावित क्षेत्रमा आपत्कालीन सेवाहरूलाई तत्पर अवस्थामा राखिएको छ ।
