वीरगंज | चाडपर्व नजिकिएसँगै वीरगञ्जको सिर्सिया सुक्खा बन्दरगाह हुँदै विदेशी मदिराको आयातमा तीव्र वृद्धि भएको छ। चालु आर्थिक वर्षको पहिलो दुई महिना, साउन र भदौमा मात्र २५ करोड १३ लाख रुपैयाँ बराबरको ७८ हजार ३३७ लिटर मदिरा आयात भएको छ। यसबाट ३२ करोड ३९ लाख रुपैयाँ राजस्व संकलन भएको छ।
भन्सार कार्यालयका तथ्यांक अनुसार, गत वर्षको सोही अवधिमा १३ करोड ३१ लाख रुपैयाँ बराबरको ५२ हजार ७८९ लिटर मदिरा आयात भएको थियो, जसबाट १८ करोड ७१ लाख रुपैयाँ राजस्व संकलन भएको थियो।
प्रमुख भन्सार अधिकृत धनबहादुर बरुवालले चाडपर्व नजिकिएसँगै मदिरा आयात उत्साहजनक रुपमा बढेको बताए। असोज महिनामा यो क्रम अझै तीव्र भएको छ। मंगलबार मात्र ग्लोबल ट्रेडिङ कर्न्सन प्रालिले ५ करोड रुपैयाँ बराबरको मदिरा आयात घोषणा गरेको उनले जानकारी दिए।
वीरगञ्ज सुक्खा बन्दरगाहको कूल भन्सार राजस्वमा मदिराको योगदान उच्च रहेको छ। गत आर्थिक वर्षमा पनि मदिरा राजस्व संकलनमा दोस्रो स्थानमा रहेको थियो। मदिरा भारतको कोलकाता बन्दरगाहसम्म पानीजहाजमा र त्यहाँबाट रेलमार्ग हुँदै नेपाल भित्र्याइन्छ। रेलमार्ग सस्तो र सुरक्षित भएकाले आयातकर्ताहरू यो नाकालाई प्राथमिकता दिने गर्छन्।
नेपालमा स्कटल्याण्डबाट जनिवाकर, भ्याट ६९, टिचर्स, अमेरिकाबाट जिमबिम, र बेलायतबाट चिवास रिगलजस्ता ब्राण्डका ह्विस्की बढी आयात हुन्छ।
यसरी मदिराको आयातले वीरगञ्ज सुक्खा बन्दरगाहको राजस्वमा महत्त्वपूर्ण योगदान पुर्याउँदै आएको छ। एक कन्टेनर ह्विस्की आयात हुँदा १ करोड ५० लाखदेखि २ करोड ५० लाख रुपैयाँसम्म राजस्व संकलन हुने गर्छ भने, वाइनको कन्टेनरबाट ७० देखि ८० लाख रुपैयाँसम्म राजस्व उठ्ने गरेको छ।
नेपालमा चाडपर्वको समयमा मदिराको माग अत्यधिक बढ्ने भएकाले आयातकर्ताहरूले वीरगञ्ज नाकाको प्रयोगलाई प्राथमिकता दिने गरेका छन्। विशेष गरी स्कटल्याण्ड, अमेरिका, र बेलायतबाट जनिवाकर, भ्याट ६९, टिचर्स, जिमबिम, र चिवास रिगलजस्ता मदिरा ब्राण्डहरूको आयातमा वृद्धि भएको छ।
रेलमार्गले आयात लागत कम गर्नुका साथै जोखिम न्यून गर्ने भएकाले तेस्रो मुलुकबाट मदिरा ल्याउने व्यवसायीहरूका लागि यो नाका अझै आकर्षक बन्दै गएको छ। वीरगञ्ज नाकाबाट आयात हुने मदिराले नेपाली बजारमा विभिन्न अन्तर्राष्ट्रिय ब्राण्डहरूको सहज आपूर्ति गराइरहेको छ, जसले चाडपर्वको समयमा उपभोक्ताहरूलाई विकल्पहरू उपलब्ध गराउनेछ।
