वाशिङटन डीसी । अमेरिकाका सरकारी वकिलहरूले फ्लोरिडास्थित पूर्वराष्ट्रपति तथा आगामी राष्ट्रपतिको निर्वाचनमा रिपब्लिकन पार्टीका उम्मेदवार डोनाल्ड ट्रम्पको गल्फ कोर्स नजिकबाट समातिएका व्यक्तिमाथि ट्रम्पको हत्या गर्न खोजेको अभियोगमा मुद्दा चलाएका छन् ।

अदालतमा बुझाएको दस्तावेजले र्यान राउथले एक महिना अघि नै ट्रम्पलाई मार्ने आशयसहितको पत्र लेखेका देखाएको थियो । गैरकानुनी रूपमा बन्दुक राखेको भन्दै चलाइएको २ मुद्दामा यसअघि नै राउथले २० वर्षसम्मको जेल सजाय पाउन सक्ने देखिएको छ ।

नयाँ अभियोग प्रमाणित भएमा उनले बढीमा आजीवन कारावासको सजाय पाउनेछन् । सरकारी अधिकारीहरूलाई लक्षित गरेर भएको हत्या हिंसाले देशमा सबै कुरा खतरामा पार्ने अमेरिकी महान्यायाधिवक्ता मेर्रिक गर्लान्डले एउटा विज्ञप्तिमा भनेका छन् । राउथलाई जिम्मेवार ठहर्‍याएन सम्भव भएको सम्मको हरेक औजार प्रयोग गर्ने कसम उनले खाएका छन् ।

ट्रम्पले भने सरकारमाथि आफ्नो हत्या प्रयासको मुद्दालाई गलत तरिकाले भड्काइरहेको आरोप लगाइरहेका छन् । सोमबार सामाजिक सञ्जालमा गरिएको एउटा पोस्टमा उनले सो मामिलालाई न्याय मन्त्रालयले फ्लोरिडालाई नै हेर्न दिनुपर्ने भनेका थिए ।