वीरगञ्ज । सामुदायिक सेवा केन्द्र र सामुदायिक प्रहरी सेवा केन्द्र कुम्हालटोलले वडा प्रहरी कार्यालय बिर्ताका प्रमुख प्रहरी निरीक्षक निरोज चौलागाईंको स्वागत तथा परिचयात्मक कार्यक्रम आयोजना गरेको छ।

सोमबार आयोजित कार्यक्रमको अध्यक्षता सामुदायिक प्रहरी सेवा केन्द्र कुम्हालटोलका अध्यक्ष रमेश कुमार चौधरीले गरेका थिए। कार्यक्रममा प्रहरी निरीक्षक चौलागाईंले शान्ति सुरक्षाको लागि प्रहरी सधैं समुदायसँगै रहेको र स्थानीयको सहयोगले सुरक्षा व्यवस्था अझ मजबुत हुने बताए। साथै, उनले जनताको साथ पाएमा आफू थप सक्रिय भएर काम गर्ने प्रतिबद्धता जनाए।

स्वागत कार्यक्रममा विशेष अतिथिका रूपमा बिरगञ्ज महानगरपालिका वडा नम्बर ५ का अध्यक्ष प्रदीप कुमार चौरसिया, कञ्चनजङ्ग बोर्डिङ स्कुलका डाइरेक्टर मार्टिन मोक्तान, मुनलाइट स्कुलका सञ्चालक श्याम केसी, वडा सदस्य मनोज कुमार साह, कुम्हालटोल सुधार समितिका अध्यक्ष नन्दलाल राउत अहिर, सहसचिव रितेश गुप्ता लगायत सामुदायिक प्रहरी सेवा केन्द्रका पदाधिकारीहरू उपस्थित थिए।

कार्यक्रममा सहभागीहरूले प्रहरी र समुदायबीचको सहकार्यलाई थप सुदृढ गर्दै शान्ति र सुरक्षा कायम गर्नुपर्नेमा जोड दिएका थिए।
सो कार्यक्रमको सञ्चालन सामुदायिक प्रहरी सेवा केन्द्र कुम्हालटोलका सचिव श्रवण बहादुर रायमाझीले गरेका थिए।

यो कार्यक्रमले समुदाय–प्रहरी साझेदारीलाई बलियो बनाउँदै स्थानीय सुरक्षा व्यवस्थामा सकारात्मक प्रभाव पार्ने अपेक्षा गरिएको छ।कार्यक्रमपछि सहभागीहरूले प्रहरी निरीक्षक निरोज चौलागाईंको कार्यशैली र अनुभवको प्रशंसा गर्दै उनको नेतृत्वमा वडा प्रहरी कार्यालय बिर्ताले शान्ति सुरक्षाको क्षेत्रमा प्रभावकारी काम गर्ने विश्वास व्यक्त गरे।

सामुदायिक प्रहरी सेवा केन्द्रका सदस्यहरूले पनि प्रहरीप्रति विश्वास प्रकट गर्दै भविष्यमा विभिन्न सामाजिक गतिविधिमा प्रहरीसँग सहकार्य गर्ने प्रतिबद्धता जनाएका छन्।

यस प्रकारका कार्यक्रमहरूले समुदाय र प्रहरीबीचको सम्बन्धलाई अझ बलियो बनाउने र स्थानीयस्तरमा हुने समस्याहरूको समाधानमा प्रहरीको प्रभावकारी भूमिका रहने अपेक्षा गरिएको छ।

समुदाय–प्रहरी साझेदारीलाई निरन्तरता दिँदै यस्ता कार्यक्रमले शान्ति, सुरक्षा र सामाजिक सद्भावलाई प्रोत्साहन गर्न महत्त्वपूर्ण योगदान दिने आयोजकहरूले बताएका छन्।