वीरगञ्ज । अत्यधिक गर्मीका कारण वीरगञ्ज महानगरपालिकाले असोज ८ र ९ गतेका लागि विद्यालयहरू बन्द गर्ने निर्णय गरेको छ। महानगरका निमित्त प्रमुख प्रशासकीय अधिकृत अरविन्दलाल कर्णले सोमबार सार्वजनिक सूचना जारी गर्दै गर्मीले विद्यार्थीहरू बेहोस हुन थालेपछि विद्यालयहरू बन्द गर्नुपरेको बताउनुभयो।

सामुदायिक र निजी विद्यालयहरू दुबै बन्द रहने यस निर्णयमा पर्सा जिल्लाका सबै विद्यालयहरू समेटिएका छन्।

मध्यतराईका पर्सा, बारा लगायतका जिल्लामा असोज महिनामा पनि अत्यधिक गर्मी भइरहेकाले तापक्रम ३६ देखि ३८ डिग्री सेल्सियससम्म पुगेको छ। यसले विद्यार्थीहरूको स्वास्थ्यमा गम्भीर असर पारेको छ, जसका कारण विभिन्न विद्यालयमा दर्जनौं विद्यार्थीहरू बेहोस भएका घटना रिपोर्ट भएका छन्।

सामाजिक सञ्जालमार्फत अभिभावकहरूले पनि विद्यालय बन्द गर्न माग गरेका थिए। अभिभावकको चासो र विद्यार्थीहरूको स्वास्थ्यलाई मध्यनजर गर्दै महानगरपालिकाले तत्काल दुई दिनका लागि पठनपाठन स्थगित गरेको हो।

महानगरपालिकाले सार्वजनिक सूचनामा गर्मीको अवस्था अझै बढ्न सक्ने सम्भावना रहेको भन्दै थप आवश्यक निर्णय लिने संकेत पनि गरेको छ। विद्यार्थीहरूको स्वास्थ्य सुरक्षालाई प्राथमिकतामा राख्दै यस्तो कदम चालिएको हो।

यसअघि पनि अत्यधिक गर्मीका कारण वीरगञ्ज र आसपासका क्षेत्रहरूमा जनजीवन प्रभावित भएको थियो। मौसममा आएको यो असामान्य परिवर्तनले विद्यार्थी मात्र नभई सर्वसाधारणलाई पनि दैनिक जीवनयापनमा समस्या पैदा गरिरहेको छ।

महानगरले विद्यालयहरूमा पुन: पठनपाठन कहिलेदेखि सञ्चालन गर्नेबारे भने तापक्रमको अवस्थालाई ध्यानमा राखेर निर्णय लिने जनाएको छ। अभिभावकहरूलाई पनि बच्चाहरूको स्वास्थ्यमा विशेष ध्यान दिन आग्रह गरिएको छ।