वीरगंज | धनुषा जिल्ला प्रहरी कार्यालयको हिरासतबाट ८ जना थुनुवा आइतबार राति फरार भएका छन्। प्रहरी स्रोतका अनुसार, थुनुवाहरूले हिरासतको भेन्टिलेशन फोडेर भागेका हुन्। भागेकामध्ये एक जनालाई प्रहरीले पुनः नियन्त्रणमा लिन सफल भएको छ भने अन्यको खोजी कार्य जारी छ।

जिल्ला प्रहरी कार्यालय धनुषाका प्रवक्ता डिएसपी रञ्जन अवाका अनुसार, फरार हुनेहरूमा लागुऔषध मुद्दाका अमितकुमार झा, रञ्जित मण्डल, रोशनकुमार मण्डल, अभास्कर यादव, विशाल मुखिया, अभद्र व्यवहारमा पक्राउ परेका मनिष मण्डल र बिक्की कार्कीका साथै एक जना नाबालक रहेका छन्।

थुनुवा फरार भएपछि धनुषा प्रहरीले रातिदेखि नै विभिन्न स्थानमा खोजी अभियान सञ्चालन गरेको छ। सीमा क्षेत्रहरूमा समेत निगरानी कडा पारिएको छ।

धनुषाका प्रमुख जिल्ला अधिकारी रामुराज कडरियाले ८ जना थुनुवा फरार भएको घटनाबारे जानकारी पाएको र घटनाको थप अनुसन्धानका लागि जिल्ला प्रहरी कार्यालयमा जान लागेको बताए।

थुनुवा भागेको यो घटनाले सुरक्षा व्यवस्थामा कमजोरी देखाएको भन्दै स्थानीयहरूले चिन्ता व्यक्त गरेका छन्।