वीरगंज । पत्रकार दिवाकर भण्डारीलाई ‘घण्टीमाई सहकारी पत्रकारिता सम्मान २०८१’ बाट सम्मान गरिएको छ। जीतपुरसिमरा उपमहानगरपालिका–४, औराहस्थित घण्टीमाई बचत तथा ऋण सहकारी संस्थाले शनिबार १२औं वार्षिक साधारणसभाको अवसरमा भण्डारीलाई नगद पाँच हजार रुपैयाँसहित सम्मान प्रदान गरेको हो।

समारोहमा अन्तर्राष्ट्रिय सहकारी महासंघ एशिया प्यासिफिकका संचालक सदस्य मिनराज कंडेल, संस्थाकी अध्यक्ष कोपिला सिंखडा, जीतपुरसिमरा उपमहानगरपालिकाका उपप्रमुख भोला प्रसाद अधिकारी, पूर्व उपप्रमुख सरस्वतीदेवी चौधरी लगायतको उपस्थिति रहेको थियो।

संस्थाका अनुसार भण्डारीले पत्रकारितामार्फत सहकारी र सामाजिक क्षेत्रमा पुर्‍याएको योगदानको कदर गर्दै यो सम्मान प्रदान गरिएको हो। भण्डारी विगत १६ वर्षदेखि अन्नपूर्ण पोष्ट राष्ट्रिय दैनिकमा कार्यरत छन् भने इशिालेख डट कम र सूचनालय साप्ताहिकका संचालक पनि हुन्। यसअघि पनि उनले हातेमालो सहकारी पत्रकारिता सम्मान, साना किसान सहकारी पत्रकारिता सम्मान, सिमरा महिला सहकारी पत्रकारिता सम्मानजस्ता सम्मानहरू प्राप्त गरिसकेका छन्।

साधारणसभामा जेष्ठ शेयर सदस्य, उत्कृष्ट विद्यार्थी, उत्कृष्ट कर्मचारी र उत्कृष्ट ऋण लिनेहरूलाई पनि सम्मान गरिएको थियो। कार्यक्रम संस्थाकी अध्यक्ष कोपिला सिंखडाको अध्यक्षतामा सम्पन्न भएको थियो भने सचिव त्रिलोक बिक्रम शाहले सञ्चालन गरेका थिए।

समारोहमा सहभागीहरुले सहकारी क्षेत्रको विकास र पत्रकारिताको भूमिकाबारे चर्चा गरेका थिए। सहकारी संस्थाले सामुदायिक विकासमा पुर्‍याएको योगदानको प्रशंसा गर्दै, सहभागीहरुले यस किसिमको सम्मानले सहकारी र पत्रकारिता क्षेत्रलाई थप प्रेरित गर्ने विश्वास व्यक्त गरे।

पत्रकार भण्डारीले सम्मान ग्रहण गर्दै सहकारी र सामाजिक मुद्दाहरुको बारेमा अझ प्रभावकारी ढंगले आवाज उठाउने प्रतिबद्धता व्यक्त गरे। उनले सहकारी संस्थाहरुले स्थानीय स्तरमा गरेको योगदानको विषयमा निरन्तर कलम चलाइरहने बताउँदै, सम्मानले आफूलाई थप जिम्मेवार र प्रेरित बनाएको उल्लेख गरे।

कार्यक्रमको अन्त्यमा संस्थाका अध्यक्ष सिंखडाले सहकारीको भावी योजनाहरुबारे जानकारी दिँदै, आगामी वर्षहरुमा पनि सहकारीको योगदानलाई अघि बढाउन सबैको सहयोग आवश्यक रहेको बताइन्।