बारा | जीतपुरसिमरा उपमहानगरपालिका वडा नम्बर ९ स्थित ऐतिहासिक गढीमाई मन्दिरमा यस वर्षको दशैं मेला धूमधामका साथ मनाउन तयारी तीव्र बनाइएको छ। हरेक वर्ष घटस्थापनादेखि महानवमीसम्म मनाइने यस मेलालाई व्यवस्थित बनाउन गढीमाई मेला व्यवस्थापन समितिले विभिन्न उपसमितिहरू गठन गरी तयारी अगाडि बढाएको छ।

समितिका अध्यक्ष रोशन चौधरीका अनुसार मेलामा विशेष धार्मिक कार्यक्रमहरू आयोजना गरिनेछ। समितिका कोषाध्यक्ष कृष्ण चौधरीले मेला असोज १७ गते घटस्थापनाका दिनबाट सुरु हुने जानकारी दिनुभयो।

असोज २४ गते खिर भोजको आयोजना गरिनेछ भने असोज २५ गते महानवमीको अवसरमा बली पूजा सम्पन्न गरिनेछ। मेलालाई सफल बनाउन स्थानीयबासी, सरोकारवाला, तथा भक्तजनहरूलाई आवश्यक सहयोग गर्न समितिले अनुरोध गरेको छ। दशैं मेलाले सांस्कृतिक तथा धार्मिक महत्त्व बोकेको हुँदा यस मेलामा सहभागी हुनेहरूको उत्साह उच्च रहेको छ।

दशैं मेला भव्य रूपमा सम्पन्न गर्न मन्दिर परिसरमा सरसफाइ, सजावट, र सुरक्षा व्यवस्थालाई विशेष प्राथमिकता दिइएको छ। गढीमाई मेला व्यवस्थापन समितिले मेलामा हुने भीडलाई ध्यानमा राखेर पर्याप्त सुरक्षाकर्मीको व्यवस्थापन गर्न सम्बन्धित निकायसँग समन्वय गरिरहेको छ।

समितिका अध्यक्ष रोशन चौधरीले मेलामा सहभागी हुन आउने भक्तजनहरूको सहजता र सुरक्षाका लागि सबै तयारी पुरा गर्न तदारुकता देखाइएको बताउनुभयो। यस वर्षको मेलामा विशेषगरी धार्मिक कार्यक्रमसँगै सांस्कृतिक प्रस्तुति पनि राखिने योजना रहेको छ, जसले मेलालाई थप आकर्षक बनाउने अपेक्षा गरिएको छ।

दशैं मेला जीतपुर गढीमाई मन्दिरको प्रमुख सांस्कृतिक पर्व भएकोले यो मेलामा बारा र आसपासका जिल्लाबाट हजारौं भक्तजनहरूको उपस्थिति हुने गर्छ। मेलाले स्थानीय आर्थिक गतिविधिमा समेत सकारात्मक प्रभाव पार्ने विश्वास लिइएको छ। मेला व्यवस्थापन समितिले स्थानीय व्यापारी, स्वयंसेवक र अन्य संस्थाहरूसँग समन्वय गरी मेलालाई व्यवस्थित र सफल बनाउन सबै उपाय अपनाइरहेको छ।