वीरगञ्ज । रौतहटको चन्द्रपुरबाट पनि चौधरी ग्रुपअन्तर्गत सिजी मोटरले नेपालमा पहिलो पटक ल्याएको विद्युतीय कारको बिक्रिवितरण शुरु भएको छ । मधेश प्रदेशलाई लक्षित गर्दै रौतहटको चन्द्रपुरमा पनि विद्युतीय कारको मधेश प्रदेशको आधिकारीक बिक्रेता मिनोल्टा इन्भेष्टमेन्टले विक्री कक्ष (शोरुम) सञ्चालनमा ल्याएको हो ।

चिनियाँ ब्राण्ड ‘होजन अटो न्यू इनर्जी भेहिकल कम्पनी’ ले उत्पादन गरेको नेटा भी कार र केवाईसी भी – ५ इलेक्ट्रिक भ्यान अब रौतहटको चपुरबाट पनि बिक्रिवितरण हुने भएको छ ।

शोरुमको सोमवार औपचारिक रुपमा चन्द्रपुर नगरपालिकाका प्रमुख संजय कुमार काफ्लेले उद्घाटन गरेका हुन् । मिनोल्टा इन्भेष्टमेन्टका सञ्चालकद्वय आकृति अग्रवाल र अंकित अग्रवालको सयुँक्त अध्यक्षतामा भएको उद्घाटन समारोहलाई सम्बोधन गर्दै नगरप्रमुख काफ्लेले वातावरणमैत्री विद्युतीय गाडीको सदुपयोगलाई बढाउनुपर्नेमा जोड दिए । व्यक्तिगत र सार्बजनिक रुपमा प्रयोजनका लागि नेटा भि र केवाइसी गाडी उपयोगी हुने उनको विश्वास छ ।

सञ्चालक आकृति अग्रवालले पनि वातावरणमैत्री नेटा भी मोडलको कार र केवाईसी भ्यानको विकल्प नभएको दावी गरीन् । उनकाअनुसार अब युगमा विकाससँगै सबैले विद्युतीय सवारी साधन प्रयोग गर्नुपर्ने हुन्छ । जसका लागि विश्वसनीय एवम् गुणस्तरीय नेटा भी नै रहेको अग्रवालको भनाई छ ।

नेटा भी मोडल कारको क्रसओभरमा ३८.५४ किलोवाट आवर क्षमताको ब्याट्री रहेको छ । साथै, यसमा ७० किलोवाट क्षमताको मोटर जडान भएको छ । सिजी मोटरले यसको ब्याट्री र मोटरमा ८ वर्ष अर्थात डेढ लाख किलोमिटरको वारेन्टी प्रदान गर्नेछ । फूल चार्जमा ३ सय ८० किलोमिटरभन्दा धेरै रेञ्ज प्रदान गर्ने प्रमुख अंकित अग्रवालको भनाई छ ।

विश्वकै ठूलो ब्याट्री उत्पादक कम्पनी ‘सिएटीएल’ ले उत्पादन गरेको लिथियम आयोन ब्याट्री यस कारमा प्रयोग भएको छ । विगत ४ वर्षमा लगातार चार मोडल उत्पादन गरेको होजनको नेटा भी ४ मिटर साइजको इलेक्ट्रीक एसयूभी कार हो । क्रसओभर डिजाइन, निकै प्रिमियम सिट, आकर्षक अलोय ह्वील, टू स्पोक स्पोर्टी स्टेरिङ ह्वील, यूनिक तरिकाले प्लेस गरिएको ड्राइभर इन्फर्मेशन डिस्प्ले, निकै ठूलो इन्फोटेन्टमेन्ट सिस्टम, यूनिक स्थानमा दिइएको गियर नव र पार्किङ ब्रेक नेटा भीको नयाँ पक्ष हो ।

नेटा भी कारको मूल्य ३७ लाख ९९ हजार रुपैँया रहेको छ । कम्पनी स्रोतका अनुसार फूल अप्सन नेटा भी अहिले बजारमा चल्तीको इलेक्ट्रीक कार नेक्सन इभी भन्दा कम मूल्यमा उपलब्ध छ । नेटा भीको लम्वाई ४०७० एमएम चौडाई १६९० एमएम र उचाई १५४० एमएमको रहेको छ । यस कारको ह्वीलवेस २४२० एमएमको रहेको छ ।

नेटा भीको दुबै साइडमा चार्जिङ पोर्ट दिएको छ । एक साइडमा रेगुलर स्लो चार्जिङ र अर्को साइडमा फास्ट चार्जिङ पोर्ट रहेको छ । आकर्षक इन्टेरियर रहेको नेटा भीमा भर्टिकल इन्फोटेन्मेन्ट सिस्टम, स्पीनर रहेको गोलो सेपको साँचो, दुबै साइड फ्ल्याट रहेको स्टेरिङ ह्वील रहेको छ ।

यो इभीलाई चार्ज गर्न स्लो चार्जरबाट १२ घण्टासम्म लाग्छ भने, फास्ट चार्जरबाट चार्ज गर्दा ३० मिनेटमै ८० प्रतिशतसम्म चार्ज गर्न सकिने अंकित अग्रवाल बताउँछन् । नेटा भी विद्युतीय कारसँगै चौधरी ग्रुपअन्तर्गतकै चांगनको इलेक्ट्रीक भ्यानको पनि शोरुमबाट विक्रीवितरण हुनेछ । कम्पनीले प्यासेन्जर कारमा नेटा भीपछि लाइट कमर्शियल सेग्मेन्टमा माइक्रोबस ल्याएको हो ।

छोटो दूरीमा चल्ने माइक्रोबसको रुपमा सिजी मोटर्सले चांगन भी–५ बाट माइक्रोबस विक्री शुरु गरेको हो । केवाइसी भ्यान छोटो दूरीमा सञ्चालनका लागि उपयुक्त छ, त्यस्तै विद्यालय र विभिन्न फर्महरुले आफ्नो कर्मचारीलाई ओसारपसार गर्न पनि प्रयोग गर्नका लागि केवाइसी भ्यान उत्तम विकल्प हुन सक्ने उद्घाटन कार्यक्रममा सहभागि वक्ताहरुले बताए ।

चांगन भी–५ मा ४१.८६ किलोवाट आवर क्षमताको सिएटीएलले उत्पादन गरेको ब्याट्री दिइएको छ । यसलाई फुलचार्जमा ३ सय किलोमिटर चलाउन सकिने सिजीले जनाएको छ । ११ जना यात्रुले आरमदायी यात्रा गर्न सक्ने यो माइक्रोबसको सञ्चालन लागत अत्यन्त न्यून पर्ने छ ।

चांगन भी–५ मा स्टाण्डर्ड चार्जरको रुपमा ३.३ किलोवाट क्षमताको नर्मल चार्जर रहेको छ । साथै, कम्पनीले ग्राहकलाई ६.६ किलोवाटको चार्जर पनि निःशुल्क उपलब्ध गराउने जनाएको छ । यसले डिसी फास्ट चार्जपनि सपोर्ट गर्नेछ । यसमा सीसीएसटु चार्जिङ पोर्ट दिइएको छ । अधिकतम १ सय किलोमिटर प्रतिघण्टाको स्पीडमा गुड्न सक्ने यो माइक्रोबसमा १७५ एमएमको ग्राउन्ड क्लियरेन्स पाउन सकिन्छ ।

सिजी मोटर्सले ४४ लाख ५० हजार रुपैयाँ मूल्य निर्धारण गरेर यसको विक्री सुरु गरेको छ । साथै, एक वर्षको बीमा र एक वर्षको वार्षिक कर पनि कम्पनीले दिने मिनोल्टा इन्भेष्टमेन्ट प्रालीकी प्रमुख आकृती अग्रवालले बताइन् । उनकाअनुसार अहिले २० प्रतिशत डाउन पेमेन्टमा किस्ताबन्दीमा पनि नेटा भी कार र केवाइसी भ्यान उपलब्ध छन् ।

नेपालमा भित्रिएको छोटो समयमै यि दुवै गाडी धेरै रुचाइएका छन् । ग्राहकहरुको सकारात्मक प्रतिक्रियाले नै रौतहटमा पनि शोरुम खोलेरै सञ्चालन गर्ने ऊर्जा पलाएको सञ्चालक अग्रवाल बताउँछन् । उनकाअनुसार मधेश प्रदेशमा दुवै गाडी धेरै रुचाइएको छ । यसको डिजाइन र विशेषता पनि यहाँको बजारको आवश्यकता लाई पूर्ति गर्ने हिसाबले बनाइएको उनको दावी छ ।

कार्यक्रममा जिल्ला प्रहरी कार्यालय रौतहटका प्रहरी नायब उपरीक्षक राजकुमार राई, रौतहट उद्योग वाणिज्य संघका उपाध्यक्ष सुनिल कुमार साह, विद्युत प्राधिकरण चन्द्रपूरका प्रमुख धिरेन्द्र कुमार यादव, चन्द्रपुर नगरपालिका वडा नम्बर ४ का वडाअध्यक्ष रवी रानामगर, जिल्ल ट्राफिक प्रहरी कार्यालय रौतहटका प्रमुख प्रहरी निरीक्षक लोकन्द्र अधिकारी, पत्रकारहरु अशोक पहाडी, रमेश तिमिल्सीना, सन्तोष काफ्ले, मनोज साह लगायतको उपस्थिती रहेको थियो ।

यसअघि वीरगञ्जमा पनि यसको शोरुम सञ्चालनमा आइसकेको छ ।