वीरगञ्ज। नेपाल पत्रकार महासङ्घको निर्वाचन मिति फेरि स्थगित भएको छ। यसअघि असोज ५ गतेका लागि तोकिएको निर्वाचन अब असोज १२ गते हुने गरी सारिएको छ। महासङ्घका कार्यवाहक अध्यक्ष रमेश विष्टले शुक्रवार जारी गरेको विज्ञप्तिमा अध्यक्ष विपुल पोखरेलको राजीनामापछि उत्पन्न अन्योलका कारण निर्वाचन मिति परिवर्तन गरिएको उल्लेख गरेका छन्।
कार्यवाहक अध्यक्ष विष्टले निर्वाचन समितिलाई असोज १२ गते निर्वाचन गर्न प्रस्ताव गरिएको जानकारी दिएका छन्। यसअघि तय गरिएको मिति परिवर्तन भएकोले महासङ्घको निर्वाचन प्रक्रिया प्रभावित भएको छ।
पर्सा शाखाका अध्यक्ष अनुप तिवारीले केन्द्रबाट सिफारिस गरिएका सदस्यहरू बाहेकका नयाँ सदस्यहरूलाई मान्यता नदिने बताएका छन्। उनले पुरानो मतदाता नामावलीको आधारमा निर्वाचन गर्नुपर्ने र नयाँ सदस्यहरूको हकमा चुनावपछि निर्णय गर्नुपर्ने बताएका छन्।
सदस्यता विवादका कारण देशभरका शाखाहरूमा असन्तोष छ। विशेष गरी मधेस प्रदेशका आठ जिल्लाका अध्यक्षहरूले केन्द्रको हस्तक्षेपको विरोध गर्दै विज्ञप्ति जारी गरिरहेका छन्।
नेपाल पत्रकार महासङ्घको केन्द्रीय साधारण सभा सम्पन्न भएपनि मतदाता नामावलीमा देखिएका विवादका कारण निर्वाचन अवरुद्ध भएको हो। भदौ २९ गते महासङ्घले नयाँ सदस्यता नामावली प्रकाशित गर्ने बताएको भए पनि केन्द्रले थप गरेका नाम समावेश गरिएमा असोज १२ को निर्वाचन समेत अवरुद्ध हुने जिल्लाका अध्यक्षहरूले चेतावनी दिएका छन्।
निर्वाचनको नयाँ मिति र सदस्यता विवादले महासङ्घको वातावरण अझै अस्थिर देखिन्छ। यसलाई समाधान गर्न महासङ्घका केन्द्रीय नेतृत्वले शीघ्र ठोस कदम चाल्नुपर्ने आवश्यकता देखिएको छ।
