वीरगन्ज | एचआईभी संक्रमितलाई प्रदान गरिने सुविधामा वृद्धि गर्न र वीरगन्जस्थित नारायणी अस्पतालमा रहेको एआरटी सेन्टरको सेवा अझ प्रभावकारी बनाउन सरोकारवालाले सुझाव दिएका छन्। नेपाल सरकारसँग समन्वय गरी एचआईभी तथा यौनरोगको क्षेत्रमा सहयोग गर्दै आएको अन्तर्राष्ट्रिय गैरसरकारी संस्था एड्स हेल्थकेयर फाउन्डेशन (ए.एच.एफ) नेपालले जिल्ला समन्वय समिति पर्साको सभा कक्षमा आयोजना गरेको वीरगन्ज महानगर स्तरिय परामर्श समिति (एलपैक) को बैठकमा यस्तो सुझाव आएको हो।

बैठकमा नारायणी अस्पतालका निमित्त मेडिकल सुपरिटेण्डेण्ट डा. एनामुल हकले, एचआईभी संक्रमितहरूको सहयोगका लागि स्थानीय तहमा बास्केट फन्ड बनाउने आवश्यकता औंल्याए। उनले सबै पालिका र संघसंस्थाको सहकार्यमा नारायणी अस्पतालको मातहतमा यो कार्यक्रम सञ्चालन गर्नुपर्नेमा जोड दिए। डा. हकले भने, “सरकारी अस्पतालमा मात्र निर्भर रहनु हुँदैन, निजी अस्पतालहरूले पनि एचआईभी परीक्षण लगायतका सेवाहरू छुट र सहुलियत दरमा उपलब्ध गराउनुपर्छ। यसले संक्रमितहरूलाई बाहिर जानुपर्ने अवस्था नआउनेछ र उनीहरूले सस्तो तथा सर्वसुलभ दरमा सेवा पाउनेछन्।”

वीरगन्ज महानगरपालिकाका जनस्वास्थ्य निरीक्षक सुमन चन्द्र ठाकुरले, महानगरपालिकाले एआरटी सेन्टरसँग समन्वय र सहकार्य गर्दै आएको जानकारी गराए। उनले भने, “एचआईभी संक्रमित सेवाग्राहीले एआरटी सेन्टरको सिफारिसमा नगरपालिकाबाट निःशुल्क परीक्षण सेवा लिन सक्ने व्यवस्था रहेको छ।”

ए.एच.एफ नेपालकी कार्यकारी प्रबन्धक संगीता भट्टले, एचआईभी संक्रमितहरूको जीवनस्तर सुधार्न विभिन्न सहयोग कार्यक्रमहरूको संचालन भइरहेको जानकारी गराइन्। विशेष गरी ‘गर्ल एक्ट’ कार्यक्रममार्फत उनीहरूको जीविकोपार्जनमा सहयोग गरिरहेको संस्थाको कामको चर्चा गरिन्।

बैठकमा ए.एच.एफ नेपालका वरिष्ठ कार्यक्रम संयोजक कृष्णहरि सापकोटाले, दीगो विकासका लक्ष्यलाई पूरा गर्न ए.एच.एफ नेपालले एचआईभी तथा यौनरोगसहितका बिरामीहरूको उपचारमा सहयोग गर्दै आएको बताए। उनले भने, “नेपाल सरकारले तय गरेका सबै मापदण्डहरूलाई पालन गर्दै हामीले सरकारसँगै सहकार्य गरेर काम गरिरहेका छौं।”

वीरगन्ज नारायणी अस्पतालको एआरटी सेन्टरमा कार्यरत काउन्सुलर रोशनी सर्राफले, हाल पर्सा, बारा, रौतहट, सर्लाही, मकवानपुर, धनुषा लगायतका जिल्लाबाट १,४१० जना संक्रमितले नियमित रूपमा सेवा लिइरहेको जानकारी गराइन्। उनले ए.एच.एफ नेपालको सहयोग र स्थानीय तहको सहकार्यले सकारात्मक परिणाम दिएको र एचआईभी संक्रमितलाई समाजले हेर्ने दृष्टिकोणमा परिवर्तन आउनुपर्नेमा जोड दिइन्।

जिल्ला समन्वय समिति पर्साका प्रमुख निरन्जन साह सोनारको अध्यक्षतामा सम्पन्न बैठकमा नारायणी अस्पतालका निमित्त मेसु डा. एनामुल हक, जनस्वास्थ्य कार्यालय पर्सा, वीरगन्ज महानगरपालिका र विभिन्न संघसंस्था तथा सरोकारवालाहरूको उपस्थिति रहेको थियो। बैठकले एचआईभी संक्रमितको उपचार र सहयोगका लागि सरकारले थप पहल गर्नुपर्ने निष्कर्ष निकालेको छ।