वीरगन्ज । रामनिवास पटेल । वीरगन्ज महानगरपालिका वडा नं १७ अलौंस्थित आइसीपी चोकमा आज अपरान्ह ट्यांकरले मोटरसाइकललाई ठक्कर दिदाँ एक जना मोटरसाइकल चालक गम्भीर घाइते भएको छ । ना ६ ख ७५०३ नम्बरको ट्यांकरको ठक्करबाट ना २९ प ६९५१ मोटरसाइकल चालक वीरगन्ज–१७ अलौंका २२ वर्षिय टिनु कुमार साह तुराहा गम्भीर घाइते भएका छन् ।

बाराको नौतनस्थित एलएस न्यूरो अस्पतालमा उपचार भइरहेको पर्साका प्रहरी नायब उपरीक्षक दीपक भारतीले जानकारी दिए । उनका अनुसार, ठक्कर दिने ट्यांकर र त्यसका चालकलाई प्रहरीले नियन्त्रणमा लिइसकेको छ । ट्याक्टरका चालकले जानाजान मोटरसाइकलमा ठक्कर दिएको भन्दै आक्रोशीत स्थानीयबासीले अलौं चोकमा टायर बालेर सडक अवरुद्ध गरेपछि प्रदर्शनकारी र प्रहरीबिच झडप पनि भएको छ ।

त्यसको समचार संकलन गर्न गएका प्लस वान टेलिभिजनका सञ्चारकर्मी आशिक अन्सारी र सन्तोष पटेलसंग प्रहरीले दुव्र्यवहारपनि गरेको छ ।घटनास्थल र प्रदर्शनको भिडियो खिच्दै रिपोर्टीङ गरिरहेका प्रहरीले आँफुहरुमाथि हातपात गर्दै क्यामेरा खोस्ने प्रयासपनि गरेको अन्सारीले बताए । वडा प्रहरी कार्यालय श्रीपुरका प्रहरी निरीक्षक श्याम कुमार बस्नेत आँँफैले क्यामेरा खोस्ने प्रयास गरेर दुव्र्यवहार गरेको अन्सारीले आरोप लगाएका छन ।