पर्सा । पर्साको जिराभवानी गाउँपालिका वडा नम्बर ५ हरैयाका २५ वर्षीय दशरथ माझी बाघको आक्रमणबाट घाइते भएका छन्। सोमबार दिउँसो गाँउ नजिकैको राष्ट्रिय वनमा दाउरा लिन गएको बेला बाघले माझीमाथि आक्रमण गरेको हो। आक्रमणबाट माझीको कम्मर मुनीको पछाडिको भाग र दाहिने सांप्रोमा गम्भीर घाउ भएको छ।

घाइते माझीको शंकरसरैया स्वास्थ्य चौकीमा उपचार गरिएको छ। उनका साथमा जंगलमा दाउरा खोज्न गएका अन्य ७ जना व्यक्तिहरूले बाघलाई होहल्ला गरेर भगाएका थिए। साथीहरूले बताए अनुसार दाउरा खोज्ने क्रममा तीन जना छुटेपछि बाघले अचानक माझीलाई आक्रमण गरेको थियो। बाघको आक्रमणबाट उत्पन्न त्रासका कारण स्थानीयबासीहरूमा भयको वातावरण छाएको छ।

स्थानीय वन क्षेत्रमा बाघको गतिविधि बढेकोले वनमा जाने व्यक्तिहरूले सतर्कता अपनाउनुपर्ने सुझाव दिइएको छ।