वीरगन्ज । रामनिवास पटेल । बीरगञ्ज, वडा नं १३ राधेमाई मन्दिरको प्राङ्गणमा हिन्दू महिलाहरूको महान पर्व हरितालिका तीजको अवसरमा विशेष सांस्कृतिक कार्यक्रम सम्पन्न भएको छ। मधेश फाउन्डेसन नेपाल, परिवर्तन फाउन्डेसन नेपाल, अपन राधेमाई युवा क्लबको आयोजनामा भएको यस कार्यक्रममा स्थानीय महिलाहरूले उत्साहपूर्वक सहभागिता जनाएका थिए।

तीजको विशेषतालाई झल्काउने नृत्य, गीत, र सांस्कृतिक प्रस्तुतिहरूले कार्यक्रममा रमाइलो माहोल सिर्जना गरेको थियो। सहभागीहरूले परम्परागत पहिरनमा सजिएर तीजका गीतहरूमा नाचगान गर्दै आफ्ना संस्कृति र परम्परालाई संरक्षण र प्रवर्द्धन गर्ने प्रयास गरेका थिए।

यस कार्यक्रमले महिला सशक्तीकरणको सन्देशलाई समेत प्रोत्साहन गरेको आयोजक संस्थाहरूले बताएका छन्। कार्यक्रममा उपस्थित स्थानीय नेता तथा व्यक्तिहरूले यस्ता सांस्कृतिक कार्यक्रमहरूले सामाजिक एकता र संस्कृतिको महत्वलाई बढावा दिने बताए।