वीरगञ्ज । वीरगञ्ज महानगरपालिका वडा नम्बर ११, मुर्ली चौकमा मानव बेचबिखन तथा ओसारपसारविरुद्धको १८औं राष्ट्रिय दिवसको अवसरमा सचेतनामूलक कार्यक्रम सम्पन्न भएको छ। सामुदायिक सेवा केन्द्र तथा सामुदायिक प्रहरी सेवा केन्द्र श्रीपुर मुर्ली, पर्साको आयोजनामा बिहीबार कार्यक्रम गरिएको हो।

कार्यक्रममा पैदल यात्रु र साइकल चालकहरूलाई मानव बेचबिखनविरुद्धको जानकारी गराउन पर्चा तथा पम्पलेट वितरण गरिएको थियो। यस अवसरमा सामुदायिक सेवा केन्द्र मुर्ली श्रीपुरका वरिष्ठ उपाध्यक्ष जयलाल साह कानुले मानव बेचबिखनको जोखिम र रोकथामका उपायबारे जनतालाई सचेत गराइएको जानकारी दिए।

कार्यक्रममा सामुदायिक सेवा केन्द्र मुर्ली श्रीपुरका अध्यक्ष राम सर्राफ, सचिव कुल नारायण प्रधान (दिलिप), सामुदायिक प्रहरी सेवा केन्द्र श्रीपुर मुर्लीका प्रहरी हवल्दार सुभाष प्रसाद यादव, प्रहरी सहायक हवल्दार लालु माया महतो र प्रहरी जवान राजु चौरसिया लगायतको उपस्थिति रहेको थियो।

यस वर्षको राष्ट्रिय दिवसको नारा “तीनै तहका सरकारको प्रतिवद्धता: मानव बेचबिखनविरुद्ध सबैको ऐक्यबद्धता” रहेको छ। सार्कको ११औं शिखर सम्मेलनबाट पारित महिला तथा बालबालिका बेचबिखनविरुद्धको महासन्धि २०६३ भदौ २० गते अनुमोदन गरिएको दिनको सम्झनामा यो दिवस हरेक वर्ष मनाइन्छ।

मानव बेचबिखनविरुद्ध सचेतनामूलक कार्यक्रमको उद्देश्य मानिसहरूलाई यस अपराधबारे जानकारी गराई सचेत बनाउने रहेको छ। कार्यक्रममार्फत समुदायमा रहेका व्यक्तिहरूलाई यस किसिमका गैरकानूनी गतिविधिहरूको पहिचान, रोकथाम, र कानुनी सहायताबारे जानकारी दिइयो।

सचेतनामूलक अभियानहरू जस्तै पर्चा वितरण, जनचेतना कार्यक्रमहरू, र प्रत्यक्ष सहभागिताले समाजमा रहेका जोखिमपूर्ण समूहहरूलाई सुरक्षाको महत्त्व र मानव बेचबिखनको सम्भावित खतरा बारे बुझ्न सहयोग पुर्‍याउने विश्वास लिइएको छ।

कार्यक्रमले यस क्षेत्रका नागरिकलाई मानव बेचबिखन जस्तो जघन्य अपराधविरुद्ध जागरूक गराउँदै भविष्यमा यस्ता गतिविधिहरूको रोकथाममा योगदान पुर्‍याउने अपेक्षा गरिएको छ।