वीरगञ्ज । सशस्त्र प्रहरीले पर्साका विभिन्न स्थानबाट ११ लाख ३३ हजार रुपैयाँभन्दा बढीको भन्सार छलीका सामान बरामद गरेको छ। सशस्त्र प्रहरी बल नेपाल १३ नम्बर गण, पर्सा हेडक्वार्टरअन्तर्गतको सीमा सुरक्षा टोलीले १० लाख ५६ हजार ३३० रुपैयाँ बराबरको अवैध सामान नियन्त्रणमा लिएको हो।
वीरगञ्ज महानगरपालिका वडा नम्बर १६ स्थित इनर्वा नाकाबाट अवैध रूपमा भारतबाट भित्र्याइँदै गरेको किराना सामान, कपडा, जुत्ता, मोबाइल पार्ट्स, र कम्प्युटर पार्ट्स बरामद गरिएको सशस्त्र प्रहरी नायब उपरीक्षक (डीएसपी) देबेन्द्र सिंहले जानकारी दिए। भन्सार छल्दै नेपालतर्फ ल्याउँदै गर्दा यी सामग्रीहरू नियन्त्रणमा लिइएको हो।
यस्तै, सशस्त्र प्रहरीको अमरपट्टी बिओपीबाट खटिएको अर्को टोलीले पनि पर्साको बिन्दबासिनी गाउँपालिका वडा नम्बर ३ स्थित छठघाटबाट ७६ हजार ९८० रुपैयाँ बराबरको अवैध कपडा बरामद गरेको छ। बरामद गरिएका सबै सामग्रीहरू आवश्यक कानूनी कारवाहीका लागि वीरगञ्ज भन्सार कार्यालयमा बुझाइएको डीएसपी सिंहले बताए।
सशस्त्र प्रहरीको नियमित गस्ती र निगरानीका क्रममा पर्सा क्षेत्रमा भन्सार छल्ने प्रयासमा रहेका विभिन्न अवैध सामानहरू लगातार बरामद भइरहेका छन्। यस किसिमको कारबाहीले सीमा क्षेत्रमा हुने अवैध क्रियाकलापहरूमा कमी ल्याउने विश्वास लिइएको छ। सशस्त्र प्रहरीले सीमावर्ती क्षेत्रमा गस्तीलाई अझ कडा बनाएको र भन्सार छल्न खोज्नेहरूलाई कडा कानुनी कारबाही गर्ने चेतावनी दिएको छ।
बरामद गरिएका यी सामग्रीहरूले देशको राजस्व बचतमा पनि योगदान पुर्याएको र यस प्रकारको निगरानीले भविष्यमा पनि सीमा क्षेत्रलाई सुरक्षित राख्न महत्त्वपूर्ण भूमिका खेल्ने विश्वास गरिएको छ।
