वीरगंज | कैलालीको भजनी नगरपालिका–८ की सोमती चौधरीलाई आजभोलि माछा र घोँगी संकलनमा भ्याइनभ्याइ छ। वर्षाको मौसममा बनेका तलाउ, नदी तथा डुबान क्षेत्रबाट माछा र झिँगामाछा संकलन गरेर उहाँले दैनिक १५०० रुपैयाँसम्म आम्दानी गर्दै आएकी छन्।

सोमतीले खेतीपातीको काम सकिएपछि फुर्सदको समय सदुपयोग गर्दै माछा र झिँगामाछा संकलन गर्ने बताउनुभयो। उहाँले भन्नुभयो, “घरमा काम नहुँदा माछा मार्न जान्छु। केही संकलन गरे आफूले खाने, सुकाएर राख्ने, अनि बिक्री गरेर पैसा कमाउने गरेकी छु। हिउँदमा सुकाएको माछा तरकारीका लागि राम्रो हुन्छ, त्यसैले अहिलेको दिनचर्या माछा मार्नमै बितेको छ।”

थारू समुदायका महिलाहरू वर्षात्को समयमा माछा र घोँगी संकलनलाई आम्दानीको स्रोत बनाएका छन्। भजनीका जितेन्द्र चौधरीले दिनभर माछा र घोँगी संकलन गरेर तीन–चार केजीसम्म जम्मा गर्ने र त्यसलाई बिक्री गरेर दैनिक १००० देखि १५०० रुपैयाँसम्म आम्दानी गर्ने बताउनुभयो। उहाँले साउन महिनामा मात्र झिँगामाछा र घोँगी बेचेर ६५,००० रुपैयाँ कमाउनुभएको छ।

भजनीको अधिकांश क्षेत्र डुबानमा पर्ने भएकाले नदीबाट आएका माछा र घोँगीलाई संकलन गरेर बिक्री गर्ने चलन रहेको छ। बजारमा घोँगीको मूल्य प्रतिकेजी २०० रुपैयाँसम्म र झिँगामाछाको मूल्य ४०० देखि ६०० रुपैयाँसम्म हुने गरेको छ। होटल व्यवसायी जीतबहादुर चौधरीका अनुसार, थारू महिलाहरूले दिनमा १० केजीसम्म घोँगी र तीन–चार केजी झिँगामाछा बिक्रीका लागि ल्याउने गरेका छन्।

माछा र घोँगी संकलनबाट राम्रो आम्दानी भए पनि यसमा स्वास्थ्यसम्बन्धी जोखिम बढी रहेको चौधरीहरूले बताएका छन्। तर, जोखिम मोलेरै भए पनि वर्षात्को मौसममा माछा र घोँगीबाट सोचेजस्तै राम्रो कमाइ हुने उनीहरू बताउँछन्।